മണർകാട്: നവീകരണമെന്ന പേരില്‍ കുത്തിപ്പൊളിച്ച കെകെ റോഡ് നന്നാക്കാൻ നടപടിയില്ല. നാട്ടുകാർ ദുരിതത്തില്‍.
പലതവണ അറ്റകുറ്റപ്പണികള്‍ നടത്തിയിട്ടും മാസങ്ങള്‍ക്കുള്ളില്‍ പൊളിയുന്നതിനെത്തുടർന്നാണ് റോഡ് അടിമുടി പുനർനിർമിക്കാൻ നടപടിയായത്.
മണർകാട് കവല മുതല്‍ ദേശീയപാതയില്‍ ആറാം മൈല്‍ ഇളപ്പുങ്കല്‍ കവലവരെയുള്ള പഴയ കെകെ റോഡില്‍ ഉണ്ടായിരുന്ന ടാറിംഗടക്കം ആദ്യഘട്ടമായി കുത്തിപ്പൊളിച്ചു. റോഡ് നിർമാണത്തിന്റെ പേരില്‍ റോഡ് അടച്ച്‌ വാഹനഗതാഗതവും നിരോധിച്ചു.
ഇതോടെ വർഷങ്ങളായുള്ള ദുരിതം തീരുന്നുവെന്ന് കരുതി സന്തോഷിച്ച നാട്ടുകാർക്കാണ് ഇപ്പോഴത് ഇരുട്ടടിയായി മാറിയത്. കുത്തിപ്പൊളിച്ച റോഡില്‍ മാസങ്ങള്‍ കഴിഞ്ഞും തുടർപണികള്‍ നടത്താൻ അധികൃതർ തയാറാകാത്തതോടെ നാട്ടുകാർക്ക് ഉണ്ടായിരുന്ന റോഡും പോയി, ഇതുവഴിയുള്ള യാത്രയും മുടങ്ങിയ അവസ്ഥയിലായി. ഈ ഭാഗത്തെ നാട്ടുകാർ ഇടവഴികളിലൂടെയാണ് ഇപ്പോള്‍ പ്രധാന റോഡിലേക്കെത്തുന്നത്.
മണർകാട് കവലയിലെ ഗതാഗത ക്രമീകരണത്തിന്റെ ഭാഗമായി ബൈപാസ് റോഡിലൂടെ വരുന്ന വാഹനങ്ങള്‍ പഴയ കെകെ റോഡിന്റെ മണർകാട് കവലയോട് ചേർന്നുള്ള ഭാഗത്തുകൂടിയാണ് ദേശീയപാതയിലേക്കിറങ്ങുന്നത്.
എന്നാല്‍, റോഡ് പൂർണമായും കുത്തിപ്പൊളിച്ചതിനെത്തുടർന്ന് ഇതുവഴിയുള്ള യാത്ര കൂടുതല്‍ ദുഷ്കരമായി.കുണ്ടും കുഴിയുമായ ഇവിടം കടക്കാൻ ഇരുചക്രവാഹന യാത്രികർ ദുരിതപ്പെടുകയാണ്. കുഴിയില്‍ചാടി മറിയുന്ന ഇരുചക്ര വാഹനങ്ങളുടെ എണ്ണമാകട്ടെ ദിനംപ്രതി കൂടിവരികയും. വലിയ വാഹനങ്ങളും കുഴിയില്‍ചാടി പോകുന്നതിനാല്‍ യാത്രക്കാരും ബുദ്ധിമുട്ടുന്നു. കോട്ടയം, അയർക്കുന്നം ഭാഗങ്ങളില്‍നിന്നെത്തുന്ന വാഹനങ്ങള്‍ ഗതാഗത നിയന്ത്രണങ്ങളുടെ ഭാഗമായി ബൈപാസ് റോഡിലൂടെയാണ് മണർകാട് കവലയിലേക്കും ദേശീയപാതയിലേക്കും കയറുന്നത്.
