വ്യത്യസ്തമായ ടൈറ്റിലിലൂടെ പ്രേക്ഷകരിൽ കൗതുകമുണർത്തിയ മലയാളം ടൈം ട്രാവൽ ത്രില്ലർ 'ഒറിജിനൽ’ലെ ആദ്യ ഗാനം പുറത്തിറങ്ങി. ‘
മാളേ മല്ലിക്കൊത്തേ’ എന്ന പേരിൽ പുറത്തിറങ്ങിയ ഗാനം സംഗീത സംവിധായകൻ ഇലക്ട്രോണിക് കിളിയുടെ വേറിട്ട സംഗീത ശൈലിയും അട്ടപ്പാടിയിൽ നിന്നുള്ള ഗായിക കവിത കാളിയപ്പന്റെ തനതായ നാടൻ ശബ്ദവും ഒരുമിക്കുന്നതാണ്.
കേരളത്തിന്റെ നാടൻ സംഗീത പാരമ്പര്യത്തിൽ വേരൂന്നിയ ‘മാളേ മല്ലിക്കൊത്തേ’യ്ക്ക് മണ്ണിന്റെ ഗന്ധമുള്ള, ഊർജസ്വലമായ സംഗീതസ്വഭാവമാണുള്ളത്. ‘ഒറിജിനലി’ന്റെ വ്യത്യസ്തമായ സംഗീതലോകത്തിന് പുതിയൊരു മാനം നൽകുന്ന ഗാനം കവിത കാളിയപ്പനാണ് ആലപിച്ചിരിക്കുന്നത്. മുത്തുവാണ് വരികൾ എഴുതിയിരിക്കുന്നത്.
ഇലക്ട്രോണിക് കിളി സംഗീതം ഒരുക്കിയ ഗാനത്തിന്റെ മ്യൂസിക് പ്രൊഡ്യൂസർമാർ ജോ ആന്റണിയും വിജയ് ആനന്ദുമാണ്.
അട്ടപ്പാടിയിലെ ആദിവാസി സമൂഹത്തിൽ നിന്നുള്ള കവിത കാളിയപ്പൻ, ആ പ്രദേശത്തിന്റെ തനതായ സംഗീതശബ്ദത്തെ ഈ ഗാനത്തിലൂടെ കൂടുതൽ വിശാലമായ പ്രേക്ഷകരിലേക്ക് എത്തിക്കുന്നു. കവിതയുടെ ശബ്ദം ഗാനത്തിന് പകർന്നുനൽകുന്ന സ്വാഭാവികമായ നാടൻ ഭാവം ‘
ഒറിജിനലി’ന്റെ വേറിട്ട സംഗീതാനുഭവത്തിൽ ‘മാളേ മല്ലിക്കൊത്തേ’യെ ശ്രദ്ധേയമാക്കുന്നു. ദേശീയ പുരസ്കാര ജേതാവായ നഞ്ചിയമ്മ ഉൾപ്പെടെയുള്ള കലാകാരന്മാരിലൂടെ അട്ടപ്പാടിയുടെ സമ്പന്നമായ തനത് സംഗീതപാരമ്പര്യം ഇതിനോടകം തന്നെ കൂടുതൽ ശ്രദ്ധ നേടിയിട്ടുണ്ട്.
