കങ്ങഴ: ലഹരി പദാർത്ഥങ്ങളുടെ ഉപയോഗം മൂലമുള്ള ദൂഷ്യവശങ്ങളെക്കുറിച്ച് വിദ്യാർത്ഥികളിൽ അവബോധം സൃഷ്ടിക്കുന്നതിനായുള്ള ബോധവൽക്കരണ സെമിനാർ മുണ്ടത്താനം ലിറ്റിൽ ഫ്ലവർ വിദ്യാനികേതൻ ആന്റ് ജൂനിയർ കോളജിൽ നടന്നു.
സംസ്ഥാന ആഭ്യന്തര വകുപ്പ് നടപ്പിലാക്കുന്ന 'ഓപ്പറേഷൻ തൂഫാൻ', എക്സൈസ് വകുപ്പിന്റെ 'ഓപ്പറേഷൻ തണ്ടർ' എന്നിവയുടെ ഭാഗമായാണ് ബോധവൽക്കരണ പരിപാടി സംഘടിപ്പിച്ചത്.
സമൂഹത്തിൽ വർദ്ധിച്ചുവരുന്ന ലഹരി മാഫിയകൾക്കെതിരെയും സിന്തറ്റിക് ലഹരി മരുന്നുകളുടെ ഭീഷണികൾക്കെതിരെയുമുള്ള പോരാട്ടത്തിന് വിദ്യാർത്ഥികളെ സജ്ജരാക്കുക എന്ന ലക്ഷ്യം കൂടിവരവിനെ അർത്ഥവത്താക്കി. വിദ്യാർത്ഥികൾ ലഹരിക്കെതിരെ പ്രതിരോധം സൃഷ്ടിക്കണമെന്നും പ്രലോഭങ്ങളിൽ വീഴാതെ ലഹരി വേണ്ടാ എന്ന് പറയാൻ ശീലിക്കണമെന്നും അധ്യാപിക റോസമ്മ സിറിയക് ലഹരി വിരുദ്ധ സന്ദേശത്തിൽ ഓർമ്മിപ്പിച്ചു.
വിദ്യാർത്ഥികളോട് സംവദിച്ച സ്കൂൾ വൈസ് പ്രിൻസിപ്പൽ വർഗീസ് ദേവസി ലഹരി വരുത്തുന്ന ശാരീരികവും മാനസികവുമായ പ്രത്യാഘാതങ്ങളെക്കുറിച്ച് വിശദീകരിച്ചു. ലഹരി ഉപയോഗിക്കുന്നവരെ ഒറ്റപ്പെടുത്തുകയോ പരിഹസിക്കുകയോ ചെയ്യാതെ അവരെക്കൂടി ചേർത്ത് പിടിച്ച് ബോധവത്കരണം നൽകണമെന്ന് അദ്ദേഹം പറഞ്ഞു.
തുടർന്ന് ലഹരി ഉപയോഗത്തിന്റെ ഭീകരത കുട്ടികൾ മനസ്സിലാക്കുന്നതിനായി പ്രത്യേക വീഡിയോ പ്രദർശനം നടന്നു. വിദ്യാർത്ഥി പ്രതിനിധി ഫിയോണ തങ്കം തോമസ് ചൊല്ലിക്കൊടുത്ത ലഹരി വിരുദ്ധ പ്രതിജ്ഞ അധ്യാപകരും വിദ്യാർത്ഥികളും ഒറ്റക്കെട്ടായി ഏറ്റുചൊല്ലി. ലഹരി പാദാർത്ഥങ്ങളോട് വിട പറഞ്ഞ് ജീവിതം തുടരാം എന്ന ആഹ്വാനവുമായി "Yes to Life, No to Drugs" എന്ന മുദ്രാവാക്യം മുഴക്കിക്കൊണ്ടാണ് ബോധവത്ക്കരണ പരിപാടി സമാപിച്ചത്.
