വൈക്കം: അപ്പര്‍ കുട്ടനാട്ടിലെ കാര്‍ഷിക മേഖലയിലെ പ്രതിസന്ധി പരിഹരിക്കാന്‍ അടിയന്തിര ഇടപെടല്‍ ഉണ്ടാകണമെന്നാവശ്യപ്പെട്ട്‌ കേരള കോണ്‍ഗ്രസ്‌ (എം) തലയാഴം മണ്ഡലം കമ്മിറ്റി ജില്ലാ കലക്‌ടര്‍ക്ക്‌ നിവേദനം നല്‍കി.
തലയാഴം, വെച്ചൂര്‍, ഉദയനാപുരം, മുണ്ടാര്‍, കല്ലറ പഞ്ചായത്തുകള്‍ ഉള്‍പ്പെടുന്ന അപ്പര്‍ കുട്ടനാടന്‍ മേഖലയിലെ ജനങ്ങള്‍ ഭൂരിഭാഗവും നെല്‍ കര്‍ഷകരാണ്‌. കൂടാതെ തെങ്ങ്‌, കാമുക്, വാഴ, കപ്പ, പച്ചക്കറി, മത്സ്യം, പൂവ്‌, കോഴി വളര്‍ത്തല്‍, കന്നുകാലി വളര്‍ത്തല്‍, പുല്ല്‌ കൃഷി തുടങ്ങി വിവിധതരം കൃഷികള്‍ നടത്തി ഉപജീവനം കഴിക്കുന്ന കര്‍ഷകരാണ്‌ ഉള്ളത്‌. കാലാവസ്‌ഥ വ്യതിയാനം മൂലം രണ്ടു പതിറ്റാണ്ടുകളായി ഇവിടെയുള്ള കര്‍ഷകര്‍ പ്രതിസന്ധിയിലാണ്‌. ഇതുപരിഹരിക്കാന്‍ നടപടികള്‍ വേണമെന്ന്‌ നിവേദനത്തില്‍ ആവശ്യപ്പെടുന്നു.
കരിയാര്‍, കെ.വി കനാല്‍ തുടങ്ങിയ പ്രധാന തോടുകളില്‍ എല്ലാം വര്‍ഷങ്ങളായി പുല്ലും, പായലും തിങ്ങി നിറഞ്ഞും, വൃക്ഷങ്ങളുടെ കമ്പുകളും, വൃക്ഷങ്ങളും വീണും നീരൊഴുക്ക്‌ തടസ്സപ്പെട്ട അവസ്‌ഥയിലാണ്‌.
വെള്ളപ്പൊക്കം വളര്‍ത്തു മൃഗങ്ങളുടെയും ജീവനും സ്വത്തിനും ഭീഷണിയാണ്‌. കൃഷി നാശവും സംഭവിക്കുന്നുണ്ട്‌. കെട്ടിക്കിടക്കുന്ന വെള്ളം ഒഴുക്കില്ലാതെ ദുഷിക്കുന്നതുമൂലം ആരോഗ്യ പ്രശ്‌നങ്ങള്‍ സൃഷ്‌ടിക്കപ്പെടുന്നുണ്ട്‌. വെള്ള ഭീഷണിയും കാലാവസ്‌ഥ വ്യതിയാനവും മൂലം വലിയ പ്രശ്‌നങ്ങള്‍ ഉണ്ടാക്കുന്നു. ശുദ്ധജല ലഭ്യത കുറവ്‌ ഈ പ്രദേശത്തിന്റെ പുരോഗതിയെ തടസ്സപ്പെടുത്തുന്ന പ്രധാന കാരണങ്ങളില്‍ ഒന്നാാണ്‌. ഇത്തരം സങ്കീര്‍ണമായ പ്രശ്‌നങ്ങളിലൂടെയാണ്‌ അപ്പര്‍ കുട്ടനാട് കടന്നുപോകുന്നത്‌. പ്രശ്‌നം പരിഹരിക്കാന്‍ കെ.വി കനാല്‍ പുനരുദ്ധാരണ പദ്ധതി നടപ്പിലാക്കുക, കാര്‍ഷിക മേഖലയിലെ അടിസ്‌ഥാനസൗകര്യങ്ങള്‍ വികസിപ്പിക്കുക, കാര്‍ഷിക യന്ത്രങ്ങള്‍ ലഭ്യമാക്കുക എന്നിവ നടപ്പിലാക്കണമന്ന്‌ നിവേദനത്തിലൂടെ ആവശ്യരപ്പെടുന്നു.
കേന്ദ്ര-സംസ്‌ഥാന സര്‍ക്കാരുകള്‍, കൃഷി വകുപ്പ്‌, കെ.എല്‍.ഡി.സി, മൈനര്‍, മേജര്‍ ഇറിഗേഷന്‍ വകുപ്പുകള്‍, കുമരകം കാര്‍ഷിക ഗവേഷണ കേന്ദ്രം എന്നിവയുടെ ഏകോപനത്തിലൂടെ അപ്പര്‍ കുട്ടനാടിന്റെ വികസനത്തിനുതകുന്ന പദ്ധതികള്‍ നടപ്പിലാക്കാന്‍ വേണ്ട അടിയന്തര നടപടികള്‍ ഉണ്ടാകണമെന്ന്‌ കേരള കോണ്‍ഗ്രസ്‌ (എം) തലയാഴം മണ്ഡലം കമ്മിറ്റി ആവശ്യപ്പെട്ടു.
