ചങ്ങനാശേരി: കുറിച്ചി മിനി സി.എഫ്.എല്ലിന് മുന്നിലും സമീപത്തെ കുടുംബശ്രീ ഭക്ഷണ വിതരണ ശാലയ്ക്കു മുന്വശത്തും മാലിന്യങ്ങള് ചാക്കുകളില് കെട്ടി തള്ളിയ നിലയില്.
മാലിന്യ ശേഖരണത്തിനായി പ്രവര്ത്തിക്കുന്ന സി.എഫ്.എല്ലിനു മുന്നില് തന്നെ മാലിന്യങ്ങള് കൂട്ടിയിട്ടിരിക്കുന്നതു പ്രദേശത്തു ഗുരുതരമായ ആരോഗ്യപ്രശ്നങ്ങള്ക്കു കാരണമായിരിക്കുകയാണെന്നു നാട്ടുകാര്.
മാലിന്യങ്ങള് കൃത്യമായി സംസ്കരിക്കുകയോ നീക്കം ചെയ്യുകയോ ചെയ്യാത്തതാണ് ഈ ദുരവസ്ഥയ്ക്കു കാരണം. സി.എഫ്.എല്ലിനു തൊട്ടടുത്തുതന്നെ കുടുംബശ്രീയുടെ ഭക്ഷണ വിതരണ ശാല പ്രവര്ത്തിക്കുന്നതു പൊതുജനങ്ങളില് കടുത്ത ആശങ്കയാണ് ഉണ്ടാക്കുന്നത്.
തുറസായ രീതിയില് ചാക്കുകളില് കെട്ടിയിട്ടിരിക്കുന്ന മാലിന്യങ്ങള് ചീഞ്ഞുനാറാന് തുടങ്ങിയതോടെ പ്രദേശത്ത് ഈച്ചയും കൊതുകും തെരുവുനായ്ക്കളുടെ ശല്യവും രൂക്ഷമായിട്ടുണ്ട്. ഭക്ഷണശാലയില് എത്തുന്നവരും ജീവനക്കാരും ദുര്ഗന്ധം കാരണം പൊറുതിമുട്ടിയിരിക്കുകയാണ്.
മഴക്കാലം എത്തുന്നതോടെ ഈ മാലിന്യങ്ങള് ഒലിച്ചിറങ്ങി പകര്ച്ചവ്യാധികള് പടര്ന്നുപിടിക്കാന് സാധ്യതയേറെയാണ്.
മാലിന്യ ശേഖരണ കേന്ദ്രത്തിന്റെ പേരില് ഇവിടെ മാലിന്യം കുന്നുകൂടുന്നതു തടയാന് അധികൃതരുടെ ഭാഗത്തുനിന്നു കാര്യക്ഷമമായ നടപടികള് ഉണ്ടാകുന്നില്ലെന്നു നാട്ടുകാര് ആരോപിക്കുന്നു.
ജനവാസ മേഖലയോട് ചേര്ന്നും ഭക്ഷണശാലയ്ക്കു സമീപവുമുള്ള ഈ മാലിന്യക്കൂമ്പാരം അടിയന്തരമായി നീക്കം ചെയ്യണമെന്നും, വീണ്ടും മാലിന്യം തള്ളുന്നതു തടയാന് കര്ശന നടപടി സ്വീകരിക്കണമെന്നുമാണു നാട്ടുകാരുടെ ശക്തമായ ആവശ്യം.





