കോട്ടയം: കുമരകത്തെ തെക്കൻ മേഖലയിൽ കോണത്താറ്റ് പാലത്തിന്റെ നിർമ്മാണത്തെ തുടർന്ന് രൂക്ഷമായ കുടിവെള്ള ക്ഷാമം നേരിട്ട സാഹചര്യത്തിൽ പ്രശ്നപരിഹാരത്തിനായി എംഎൽഎ നേരിട്ട് സ്ഥലത്തെത്തി. വാട്ടർ അതോറിറ്റി ഉദ്യോഗസ്ഥർ, പാലത്തിന്റെ എൻജിനീയർമാർ, കരാറുകാരൻ എന്നിവരുമായി നടത്തിയ ചർച്ചയിൽ കുടിവെള്ള വിതരണം പുനഃസ്ഥാപിക്കുന്നതിനുള്ള അടിയന്തര നടപടികൾ തീരുമാനിച്ചു.
കോണത്താറ്റ് പാലത്തിന് സമീപത്തെ തോട്ടിലൂടെ കടന്നുപോകുന്ന കുടിവെള്ള പൈപ്പ് ലൈൻ വെള്ളത്തിനടിയിലൂടെ സ്ഥാപിക്കുന്ന പ്രവൃത്തി നാളെ മുതൽ ആരംഭിക്കുമെന്ന് വാട്ടർ അതോറിറ്റി അറിയിച്ചു. ഇതോടെ കുടിവെള്ള വിതരണം ശാശ്വതമായി പുനഃസ്ഥാപിക്കാനാകുമെന്നാണ് പ്രതീക്ഷ.
കുമരകത്തിന്റെ തെക്കൻ മേഖലയിലേക്ക് തടസ്സമില്ലാതെ കുടിവെള്ളം എത്തിക്കുന്നതിന് ആവശ്യമായ എല്ലാ നടപടികളും അടിയന്തരമായി സ്വീകരിക്കുമെന്ന് എംഎൽഎ അറിയിച്ചു. പ്രദേശത്തെ വിവിധ ഭാഗങ്ങളിൽ കുടിവെള്ള വിതരണം തടസ്സപ്പെട്ടതായി നേരിട്ട് ബോധ്യപ്പെട്ടതായും അദ്ദേഹം പറഞ്ഞു.
വാൽവുകൾ കൃത്യസമയത്ത് തുറന്ന് എല്ലാ പ്രദേശങ്ങളിലേക്കും കുടിവെള്ളം ലഭിക്കുന്നുണ്ടെന്ന് ഉറപ്പാക്കണമെന്ന് എംഎൽഎ വാട്ടർ അതോറിറ്റി എൻജിനീയർമാർക്ക് നിർദേശം നൽകി.
സ്ഥലസന്ദർശനത്തിൽ കുമരകം ഗ്രാമപഞ്ചായത്ത് പ്രസിഡന്റും പഞ്ചായത്ത് അംഗങ്ങളും ബ്ലോക്ക് പഞ്ചായത്ത് അംഗങ്ങളും എംഎൽഎയ്ക്കൊപ്പമുണ്ടായിരുന്നു.
