കുമരകം: വിദ്യാർത്ഥികളുടെ സുരക്ഷ ഉറപ്പാക്കുന്നതിനും സ്കൂളിലെ കായിക സൗകര്യങ്ങൾ മെച്ചപ്പെടുത്തുന്നതിനുമായി കുമരകം ഗവ. ഹയർ സെക്കൻഡറി സ്കൂളിലെ വർഷങ്ങൾ പഴക്കമുള്ള മാലിന്യക്കുളം മൂടാൻ നടപടി. ഇതിനായി കോട്ടയം ജില്ലാ പഞ്ചായത്തിന്റെ 2026–27 വാർഷിക പദ്ധതിയിൽ 25 ലക്ഷം രൂപ അനുവദിച്ചു.
മാലിന്യം നിറഞ്ഞ കുളം മൂടി ഗ്രൗണ്ടിന്റെ വിസ്തീർണം വർധിപ്പിക്കുന്നതിനും സ്കൂൾ അറ്റകുറ്റപ്പണികൾ നടത്തുന്നതിനുമാണ് തുക വിനിയോഗിക്കുക. പദ്ധതി യാഥാർഥ്യമാകുന്നതോടെ വിദ്യാർത്ഥികൾക്ക് കൂടുതൽ സുരക്ഷിതവും മെച്ചപ്പെട്ടതുമായ പഠന-കായിക അന്തരീക്ഷം ഒരുക്കാൻ കഴിയുമെന്നാണ് വിലയിരുത്തൽ.
കുട്ടികളുടെ സുരക്ഷയെ ബാധിക്കുന്നതിനാൽ സ്കൂൾ കുളം മൂടണമെന്ന് പൊതുവിദ്യാഭ്യാസ ഡയറക്ടർ നിർദേശിച്ചിരുന്നു. തുടർന്ന് നടത്തിയ പരിശോധനയിൽ കുളം അശാസ്ത്രീയമാണെന്ന് എൽഎസ്ജിഡി എൻജിനിയറിംഗ് വിഭാഗം ഉദ്യോഗസ്ഥർ വിലയിരുത്തുകയും ചെയ്തിരുന്നു.
സ്കൂൾ പി.ടി.എ ഭാരവാഹികളുമായി നടത്തിയ ചർച്ചകൾക്കും അവരുടെ അഭിപ്രായത്തിനും പിന്നാലെയാണ് തീരുമാനം കൈക്കൊണ്ടത്. കുമരകം ഡിവിഷനിലെ വിവിധ ക്ലബുകളും യുവജന സംഘടനകളും മാലിന്യക്കുളം മൂടി ഗ്രൗണ്ടിന്റെ വിസ്തീർണം വർധിപ്പിക്കണമെന്ന ആവശ്യം നേരത്തേ ഉന്നയിച്ചിരുന്നു.
കുളം മൂടിയ ശേഷം ആ സ്ഥലത്ത് വിദ്യാർത്ഥികൾക്കായി ക്രിക്കറ്റ് നെറ്റ് പ്രാക്ടീസ് ഉൾപ്പെടെയുള്ള കായിക സൗകര്യങ്ങൾ ഒരുക്കുന്നതിനുള്ള സാധ്യതയും പരിശോധിക്കുമെന്ന് അധികൃതർ അറിയിച്ചു.
