കോട്ടയം: നീറ്റ് പരീക്ഷാ വിഷയത്തിലും കേന്ദ്രസർക്കാരിന്റെ വിദ്യാഭ്യാസ നയങ്ങൾക്കെതിരെയും കെഎസ്യു സംസ്ഥാനവ്യാപകമായി ആഹ്വാനം ചെയ്ത വിദ്യാഭ്യാസ ബന്ദ് കോട്ടയം ജില്ലയിൽ സമ്പൂർണമായിരുന്നുവെന്ന് കെഎസ്യു ജില്ലാ കമ്മിറ്റി. ജില്ലയിലെ വിവിധ വിദ്യാഭ്യാസ സ്ഥാപനങ്ങളിൽ പ്രതിഷേധത്തിന്റെ ഭാഗമായി പഠിപ്പ് മുടക്ക് സംഘടിപ്പിച്ചതായും സംഘടന വ്യക്തമാക്കി.
ജില്ലയിലെ ഒമ്പത് നിയോജക മണ്ഡലങ്ങളിലായി യൂണിറ്റ് കമ്മിറ്റികളും മണ്ഡലം കമ്മിറ്റികളും ഉൾപ്പെടെ കെഎസ്യുവിന്റെ വിവിധ ഘടകങ്ങളുടെ നേതൃത്വത്തിലാണ് സമരം നടന്നത്. സംസ്ഥാന-ജില്ലാ ഭാരവാഹികൾ, ബ്ലോക്ക് പ്രസിഡന്റുമാർ, യൂണിറ്റ് കമ്മിറ്റി ഭാരവാഹികൾ എന്നിവർ വിവിധ കേന്ദ്രങ്ങളിൽ സമരത്തിന് നേതൃത്വം നൽകി.
വിദ്യാർത്ഥികളെ ബാധിക്കുന്ന കേന്ദ്രസർക്കാരിന്റെ വിദ്യാഭ്യാസ നയങ്ങൾക്കെതിരെയും, പ്രതിപക്ഷ നേതാവ് രാഹുൽ ഗാന്ധി ഉൾപ്പെടെയുള്ള എംപിമാർക്കെതിരായ നടപടികളിൽ പ്രതിഷേധിച്ചുമാണ് വിദ്യാഭ്യാസ ബന്ദ് സംഘടിപ്പിച്ചത്. വിദ്യാർത്ഥികളുടെ അവകാശങ്ങൾ സംരക്ഷിക്കപ്പെടുന്നതുവരെ സമരപരിപാടികളുമായി മുന്നോട്ടുപോകുമെന്ന് കെഎസ്യു ജില്ലാ പ്രസിഡന്റ് കെ.എൻ. നൈസാം പറഞ്ഞു.
