കോട്ടയം: ഓണത്തിന് നാട്ടിലെത്തുന്ന മലയാളികളെ ലക്ഷ്യമിട്ട് സ്വകാര്യ ബസ് ലോബി.
ചെന്നൈ, ബംഗളൂരു, മംഗലാപുരം തുടങ്ങിയ റൂട്ടുകളിലാണ് സാധാരണനിരക്കിന്റെ ഇരട്ടിയിലേറെ ഈടാക്കുന്നത്.
അതേസമയം ഓണക്കാലത്തെ തിരക്ക് നേരിടാൻ കെ.എസ്.ആർ.ടി.സി പ്രഖ്യാപിച്ചിട്ടുള്ള സർവീസുകൾ പര്യാപ്തമല്ലെന്ന പരാതി ശക്തമാണ്.
മലയാളികൾ കൂടുതലുള്ള ചെന്നൈയിലേക്ക് കോട്ടയത്ത് നിന്ന് കെ.എസ്.ആർ.ടി.സിക്ക് നിലവിൽ നേരിട്ടുള്ള സർവീസില്ല.
സാധാരണ ദിവസങ്ങളിൽ കോട്ടയം-ബംഗളൂരു റൂട്ടിൽ സ്വകാര്യ ബസുകളിൽ 600 മുതൽ 2000 രൂപ വരെയാണ് നിരക്ക്.
കെ.എസ്.ആർ.ടി.സിയിൽ ഇതേ റൂട്ടിൽ 1500 രൂപ വരെയാണ് സാധാരണ നിരക്ക്.
എന്നാൽ ഓണത്തിരക്ക് ആരംഭിക്കുന്നതോടെ സ്വകാര്യബസുകളുടെ നിരക്ക് കുത്തനെ ഉയരും. അടുത്ത ആഴ്ച മുതൽ 2000 മുതൽ 5000 രൂപ വരെയാണ് സ്വകാര്യ ബസുകൾ ഈടാക്കുക.ഓണാഘോഷം കഴിഞ്ഞ് മടങ്ങുന്നവർക്കും സ്വകാര്യബസുകളുടെ നിരക്കുവർദ്ധനയിൽ നിന്ന് രക്ഷയില്ല.
സെപ്തംബർ ആദ്യം കോട്ടയം–ബംഗളൂരു റൂട്ടിൽ കെ.എസ്.ആർ.ടി.സി നിരക്ക് 981 മുതൽ 1423 രൂപ വരെയായിരിക്കുമ്പോൾ സ്വകാര്യ ബസുകളിൽ 4200 രൂപ വരെ ഈടാക്കുന്നു.
