തിരുവനന്തപുരം: കോവിഡ് മഹാമാരിയുടെ കാലത്ത് സംസ്ഥാനത്ത് നടപ്പിലാക്കിയ വിവിധ പ്രതിരോധ പദ്ധതികളിലെ ഗുരുതരമായ സാമ്പത്തിക ക്രമക്കേടുകളില് ഡോ.
മുഹമ്മദ് അഷീലിനെതിരെ വകുപ്പുതല അച്ചടക്ക നടപടിക്ക് ശുപാർശ ചെയ്ത് ധനകാര്യവകുപ്പിലെ പ്രത്യേക ഓഡിറ്റ് വിഭാഗം.
അടിയന്തര സാഹചര്യങ്ങളുടെ മറവില് കടുത്ത ചട്ടലംഘനങ്ങളും സാമ്പത്തിക അനാസ്ഥയും നടന്നുവെന്നാണ് ധനകാര്യവകുപ്പിന്റെ ഔദ്യോഗിക അന്വേഷണ റിപ്പോർട്ടില് ചൂണ്ടിക്കാണിക്കുന്നത്.
ഇതുമായി ബന്ധപ്പെട്ട് അഷീല് നല്കിയ വിശദീകരണം പൂർണ്ണമായും തള്ളിക്കൊണ്ടാണ് കടുത്ത നടപടി സ്വീകരിക്കാൻ ധനകാര്യവകുപ്പ് ആരോഗ്യവകുപ്പിനോട് ആവശ്യപ്പെട്ടിരിക്കുന്നത്.
ഒന്നാം പിണറായി സർക്കാരിന്റെ കാലത്ത് കോവിഡ് പ്രതിരോധ പ്രവർത്തനങ്ങളുടെയും സാമൂഹ്യ സുരക്ഷാ മിഷന്റെയും (KSSM) പ്രധാന ചുമതലകള് വഹിച്ചിരുന്നത് ഡോ. മുഹമ്മദ് അഷീലായിരുന്നു. എന്നാല് ഈ കാലയളവില് കോടിക്കണക്കിന് രൂപയുടെ ഇടപാടുകള് ചട്ടവിരുദ്ധമായാണ് നടത്തിയതെന്ന് ധനകാര്യവകുപ്പിലെ പരിശോധന വിഭാഗം കണ്ടെത്തുകയായിരുന്നു.
സംസ്ഥാന സർക്കാരിന്റെ കൃത്യമായ മുൻകൂർ അനുമതി വാങ്ങാതെയോ, ടെൻഡർ നടപടികളോ യാതൊരുവിധത്തിലും പാലിക്കാതെയോ ആണ് ഡോ. മുഹമ്മദ് അഷീല് വൻ തുകകള് ചെലവഴിച്ചത്.
പണം ചെലവഴിച്ച് മൂന്ന് മാസത്തിനുള്ളില് പാലിക്കേണ്ട നടപടിക്രമങ്ങള് ക്രമപ്പെടുത്തുകയോ, കൃത്യമായ ഔദ്യോഗിക ബില്ലുകളോ വൗച്ചറുകളോ രേഖപ്പെടുത്തുകയോ ചെയ്തിട്ടില്ലെന്നും ഓഡിറ്റില് വ്യക്തമായി.
വിവിധ ജില്ലാ കോ-ഓർഡിനേറ്റന്മാർക്കായി 44.63 ലക്ഷം രൂപയാണ് ചട്ടങ്ങള് കാറ്റില്പ്പറത്തി മുൻകൂർ അഡ്വാൻസായി നല്കിയത്. ഇതിന് ശേഷവും യാതൊരുവിധ അനുമതിയും വാങ്ങിയിരുന്നില്ല.
കേരള സാമൂഹ്യ സുരക്ഷാ മിഷൻ (KSSM) ഹാളിന്റെ നവീകരണവുമായി ബന്ധപ്പെട്ട് മാത്രം 19 ലക്ഷത്തിലധികം രൂപയുടെ വൻ സാമ്പത്തിക ക്രമക്കേട് നടന്നതായും ഓഡിറ്റ് റിപ്പോർട്ടില് അക്കമിട്ട് നിരത്തുന്നു.
അതേസമയം, അടിയന്തര കോവിഡ് പശ്ചാത്തലത്തില് വകുപ്പ് സെക്രട്ടറിയുടെ പൂർണ്ണമായ അനുമതിയോടെയാണ് താൻ കാര്യങ്ങളെല്ലാം ചെയ്തതെന്നും, നിലവില് തനിക്കെതിരെ ധനകാര്യവകുപ്പ് ഉന്നയിച്ചിരിക്കുന്ന തെളിവുകളും കണ്ടെത്തലുകളും തികച്ചും അപൂർണ്ണമാണെന്നുമാണ് ഡോ. മുഹമ്മദ് അഷീല് സ്വീകരിക്കുന്ന നിലപാട്.
വിഷയം കടുത്ത രാഷ്ട്രീയ-സാമൂഹ്യ വിവാദമായി മാറിയ പശ്ചാത്തലത്തില് കോവിഡ് കാലത്തെ അഴിമതികളില് കർശന നടപടിയുണ്ടാകുമെന്ന് ആരോഗ്യമന്ത്രി കെ. മുരളീധരൻ വ്യക്തമാക്കി.
ഈ തട്ടിപ്പുകളെയും സാമ്പത്തിക ക്രമക്കേടുകളെയും കുറിച്ച് അതീവ ഗൗരവത്തോടെ സമഗ്രമായ അന്വേഷണം നടത്തി അടിയന്തര റിപ്പോർട്ട് സമർപ്പിക്കാൻ മൂന്ന് മുതിർന്ന ഐഎഎസ് (IAS) ഉദ്യോഗസ്ഥരെ പ്രത്യേകമായി ചുമതലപ്പെടുത്തിയതായി മന്ത്രി അറിയിച്ചു.
കോവിഡ് കാലത്ത് മെഡിക്കല് ഉപകരണങ്ങളും മരുന്നുകളും വാങ്ങിയതുള്പ്പെടെയുള്ള എല്ലാ സാമ്പത്തിക ഇടപാടുകളും ഈ ഉന്നതതല സമിതി വിശദമായി അന്വേഷിക്കും. അന്വേഷണ റിപ്പോർട്ട് ലഭിച്ചയുടൻ കുറ്റക്കാർ എത്ര ഉന്നതരാണെങ്കിലും അവർക്കെതിരെ വിട്ടുവീഴ്ചയില്ലാത്ത കർശന നിയമനടപടികള് സ്വീകരിക്കുമെന്നും ആരോഗ്യമന്ത്രി കെ. മുരളീധരൻ വ്യക്തമാക്കി.
