ഗാന്ധിനഗർ: കോട്ടയം ഗവ. ഡെന്റല്‍ കോളജ് ആശുപത്രിയിലെ ഫാർമസി അടച്ചിട്ടതിനെത്തുടർന്ന് രോഗികള്‍ ദുരിതത്തില്‍.
ഒക്ടോബർ 20ന് അടച്ച ഫാർമസി ഇന്നലെ വരെയും തുറന്നില്ലെന്ന് രോഗികള്‍ പറയുന്നു.
ചികിത്സയ്ക്കുശേഷം മരുന്ന് വാങ്ങാനെത്തുന്നവർക്ക് മുന്നില്‍ ഇന്ന് അവധി എന്ന ബോർഡാണ് കാണാനുള്ളത്.
അധികൃതരെ ബന്ധപ്പെട്ടിട്ടും നടപടിയുണ്ടാകാത്തതോടെ പുറത്തുനിന്ന് ഉയർന്ന വിലയ്ക്ക് മരുന്നു വാങ്ങേണ്ട ഗതികേടിലാണ് രോഗികള്‍. ദിനംപ്രതി നൂറുകണക്കിന് ആളുകളാണ് ആശുപത്രിയില്‍ ചികിത്സയ്ക്കായി എത്തുന്നത്. പല്ലെടുക്കുന്ന രോഗികള്‍ക്ക് വേദന സംഹാരി പോലുള്ള മരുന്നുകള്‍ അടിയന്തരമായി ആവശ്യമാണ്.
ഫാർമസി അടച്ചിട്ടിരിക്കുന്നതിനാല്‍ നെട്ടോട്ടം ഓടേണ്ട ഗതികേടിലാണ് രോഗികള്‍. നിലവിലുണ്ടായിരുന്ന ജീവനക്കാരുടെ കാലാവധി അവസാനിച്ചതാണ് ഫാർമസി അടച്ചിടാൻ കാരണമെന്നാണ് അധികൃതർ നല്‍കുന്ന വിശദീകരണം. പുതിയ ജീവനക്കാരെ ഇതുവരെ നിയമിച്ചിട്ടില്ല. ആശുപത്രി വികസന സമിതിയാണ് നിയമന നടപടി സ്വീകരിക്കേണ്ടതെന്നും അധികൃതർ പറയുന്നു. ഫാർമസി തുറക്കാത്തതോടെ സാധാരണക്കാരായ രോഗികള്‍ മരുന്നിന് സ്വകാര്യ സ്ഥാപനങ്ങളെ ആശ്രയിക്കേണ്ടി വരികയാണ്.
