കോട്ടയം : ഏറ്റുമാനൂർ കാരിത്താസ് ജംഗ്ഷനിലെ ഗതാഗതക്കുരുക്ക് നിയന്ത്രിക്കുന്നതിനും, വാഹനഗതാഗതം സുഗമമാക്കുന്നതിനുമായി നാളെ(01/11/26) മുതൽ പരീക്ഷണാടിസ്ഥാനത്തിൽ ഗതാഗത ക്രമീകരണങ്ങൾ ഏർപ്പെടുത്തും. ഒക്ടോബർ 27ആം തീയതി ഏറ്റുമാനൂർ മുനിസിപ്പൽ ഓഫീസിൽ വെച്ചു ചേർന്ന ട്രാഫിക് റെഗുലേറ്ററി കമ്മിറ്റിയുടെ തീരുമാനത്തിന്റെ അടിസ്ഥാനത്തിലാണ് നിയന്ത്രണങ്ങൾ ഏർപ്പെടുത്തുന്നത്.
ഇതിന്റെ ഭാഗമായി താഴെപ്പറയുന്ന നിയന്ത്രണങ്ങൾ നടപ്പിലാക്കുന്നതാണ്.
1. എം.സി. റോഡിൽ നിന്ന് കാരിത്താസ് ജംഗ്ഷൻ വഴി പഴയ എം.സി. റോഡിലൂടെ കാരിത്താസ് ആശുപത്രിയിലേക്കുള്ള പ്രവേശനം നിരോധിച്ചിരിക്കുന്നു.
2. കാരിത്താസ് ജംഗ്ഷൻ ഭാഗത്തും പഴയ എം.സി. റോഡിലും വാഹനങ്ങൾ പാർക്കു ചെയ്യുന്നത് നിരോധിച്ചിട്ടുള്ളതാണ്.
3. എം സി റോഡിലൂടെ കാരിത്താസ് ജംഗ്ഷൻ വഴി ഏറ്റുമാനൂർ ഭാഗത്തേക്ക് പോകുന്ന സർവീസ് ബസുകൾ മാതാ ആശുപത്രിക്ക് സമീപമുള്ള ബസ് സ്റ്റോപ്പിൽ നിർത്തി യാത്രക്കാരെ കയറ്റുകയും ഇറക്കുകയും ചെയ്യേണ്ടതാണ്. കോട്ടയം ഭാഗത്തേക്ക് പോകുന്ന സർവീസ് ബസുകൾ തെള്ളകം ചൈതന്യ പാസ്റ്ററൽ സെന്ററിന് സമീപമുള്ള ബസ് സ്റ്റോപ്പിൽ നിർത്തി യാത്രക്കാരെ കയറ്റുകയും ഇറക്കുകയും ചെയ്യേണ്ടതാണ്.
4. ഏറ്റുമാനൂർ ഭാഗത്തേക്ക് പോകുന്ന വാഹനങ്ങൾക്ക് കാരിത്താസ് ആശുപത്രി ഭാഗത്തു നിന്നും കാരിത്താസ് ജംഗ്ഷനിലേക്കുള്ള റോഡിലേക്ക് പ്രവേശവനമില്ല.
5. എം.സി. റോഡിൽ നിന്ന് കാരിത്താസ് ആശുപത്രി ഭാഗത്തേക്കും മറ്റ് പ്രദേശങ്ങളിലേക്കും പോകുന്നതിനും, വിവിധ ഭാഗങ്ങളിൽ നിന്ന് എം.സി. റോഡിൽ പ്രവേശിക്കുന്നതിനും വാഹനയാത്രക്കാർക്ക് പഴയ എംസി റോഡ്, പാറോലിക്കൽ ജംഗ്ഷൻ, തെള്ളകം സ്കൂൾ ജംഗ്ഷൻ,തെള്ളകം എസ്.ബി.ഐ. ജംഗ്ഷൻ, പരിത്രാണ ജംഗ്ഷൻ എന്നീ ബദൽ റോഡുകൾ ഉപയോഗിക്കാവുന്നതാണ്.
പരീക്ഷണാടിസ്ഥാനത്തിൽ നടപ്പിലാക്കിയിട്ടുള്ള ഈ ഗതാഗത ക്രമീകരണങ്ങളോട് വാഹനയാത്രക്കാരും പൊതുജനങ്ങളും പൂർണമായി സഹകരിക്കണമെന്നും, നിർദേശങ്ങൾ കൃത്യമായി പാലിച്ച് ഗതാഗതം സുഗമമാക്കാൻ സഹകരിക്കണമെന്നും അധികൃതർ അറിയിച്ചു.
