വൈക്കം : 2025ലെ കേരള സർക്കാർ ഉജ്ജ്വല ബാല്യം പുരസ്കാരം നേടിയ വൈക്കം സ്വദേശിനി എസ്. സൂര്യഗായത്രിക്ക് ശിശുദിന വാരാഘോഷത്തിന്റെ സമാപനച്ചടങ്ങിൽ ആദരം. കോട്ടയം വനിതാ ശിശുവികസന വകുപ്പിന്റെയും ജില്ലാ ശിശു സംരക്ഷണ യൂണിറ്റിന്റെയും ആഭിമുഖ്യത്തിൽ നവംബർ 12 മുതൽ 20 വരെ സംഘടിപ്പിച്ച ശിശുദിന വാരാഘോഷത്തിന്റെ ഭാഗമായാണ് ആദരവ് നൽകിയത്.

കൈകൾ ബന്ധിച്ച് വേമ്പനാട്ടുകായൽ നീന്തിക്കടന്ന അസാമാന്യ നേട്ടത്തിലൂടെ വേൾഡ് വൈഡ് ബുക്ക് ഓഫ് റെക്കോർഡ്സ്, ഇന്ത്യ ബുക്ക് ഓഫ് റെക്കോർഡ്സ്, എലൈറ്റ് ബുക്ക് ഓഫ് റെക്കോർഡ് ഉൾപ്പെടെയുള്ള റെക്കോർഡ് ബുക്കുകളിൽ ഇടം നേടിയ താരമാണ് സൂര്യഗായത്രി.കൂടാതെ 2025 ലെ കേരളീയം പുരസ്കാരത്തിനും അർഹയായിട്ടുണ്ട്.ഈ നേട്ടങ്ങൾ പരിഗണിച്ചാണ് 2025-ലെ ഉജ്ജ്വല ബാല്യം പുരസ്കാരത്തിന് സൂര്യഗായത്രി അർഹയായത്.
വൈക്കം നഗരസഭയുടെ സഹകരണത്തോടെ വേമ്പനാട് സ്വിമ്മിംഗ് അക്കാദമി പ്രോഗ്രാം കോഡിനേറ്റർ ഷിഹാബ് കെ സൈനു സംഘടിപ്പിച്ച ഇരുപത്തിയഞ്ചാമത്തെ വേൾഡ് റെക്കോർഡ് ആയിരുന്നു ഇത്. ലിസ്യൂ ഇംഗ്ലീഷ് സ്കൂളിലെ ആറാം ക്ലാസ് വിദ്യാർഥിനിയായ സൂര്യഗായത്രി വൈക്കം പുളിഞ്ചോട് നെടുവേലി മഠത്തിൽപറമ്പിൽ സുമിഷ്-രാഖി ദമ്പതികളുടെ ഏക മകളാണ്.
കോട്ടയം ബേക്കർ മെമ്മോറിയൽ ഹൈസ്കൂൾ ഹാളിൽ നടന്ന ചടങ്ങിൽ ജില്ലാ പഞ്ചായത്ത് പ്രസിഡന്റ് ജോഷി ഫിലിപ്പിന്റെ അധ്യക്ഷതയിൽ ചേർന്ന യോഗത്തിൽ കേരള നിയമസഭാ സ്പീക്കർ തിരുവഞ്ചൂർ രാധാകൃഷ്ണൻ സൂര്യഗായത്രിയെ ആദരിച്ചു. ചടങ്ങിൽ ജനപ്രതിനിധികളും സാമൂഹിക-സാംസ്കാരിക രംഗത്തെ പ്രമുഖരും പങ്കെടുത്തു.






