ഈരാറ്റുപേട്ട: രാജ്യത്തെ ജനാധിപത്യ സംവിധാനത്തിന്റെ അടിത്തറ തകർക്കാനുള്ള നീക്കങ്ങളാണ് കേന്ദ്രത്തിലെ മോദി സർക്കാർ നടത്തുന്നതെന്നും ജനാധിപത്യാവകാശങ്ങൾ നിഷേധിക്കപ്പെടുന്ന സാഹചര്യത്തിൽ നോക്കിനിൽക്കാനാവില്ലെന്നും മന്ത്രി ഒ.ജെ ജനീഷ് പറഞ്ഞു.
യൂത്ത് കോൺഗ്രസ് ജില്ലാ തല പദയാത്രയുടെ സമാപന സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
രാജ്യത്തെ പ്രായപൂർത്തിയായ ഒരോ പൗരനും ഭരണഘടന ഉറപ്പുനൽകുന്ന വോട്ടവകാശം പോലും നിഷേധിക്കുന്ന സാഹചര്യമാണുള്ളത്.
അധികാരം നിലനിർത്തുന്നതിനായി ഏത് തന്ത്രവും പ്രയോഗിക്കാൻ കേന്ദ്രസർക്കാർ തയാറാകുന്നു.
തെരഞ്ഞെടുപ്പ് കമ്മീഷനെപ്പോലും ബി.ജെ.പിയുടെ നിർദേശങ്ങൾക്കനുസരിച്ച് പ്രവർത്തിക്കുന്ന സംവിധാനമാക്കി മാറ്റിയിരിക്കുകയാണെന്നും അദ്ദേഹം ആരോപിച്ചു.
മാത്യു കുഴൽനാടൻ എം.എൽ.എ മുഖ്യപ്രഭാഷണം നടത്തി.
എം.ജെ സെബാസ്റ്റ്യൻ എം.എൽ.എ, റോണി കെ.ബേബി എം.എൽ.എ, ബാലകൃഷ്ണൻ പെരിയ, അഡ്വ.പി.എ സലീം, ഗൗരിശങ്കർ, ബിനു ചുള്ളിയിൽ, ചിന്റു കുര്യൻ, ഷിയാസ് സി.സി.എം തുടങ്ങിയവർ സംസാരിച്ചു.
വാദ്യമേളങ്ങളുടെ അകമ്പടിയോടെ പനക്കപ്പാലത്തുനിന്ന് ആരംഭിച്ച പദയാത്രയിൽ നിരവധി പേർ പങ്കെടുത്തു.





