പാലാ : മേരി ബനീഞ്ഞ ഫൗണ്ടേഷൻ ഏർപ്പെടുത്തിയ ഈ വർഷത്തെ മേരി ബനീഞ്ഞ സാഹിത്യ അവാർഡ് ചാക്കോ സി പൊരിയത്തിനും വാനമ്പാടി അവാർഡ് ഫാ. ഡോ. തോമസ് മൂലയിലിനും. ഡിസംബർ അഞ്ചിന് പാലാ സി.എം.സി. പ്രൊവിൻഷ്യൽ ഹൗസിൽ നടക്കുന്ന ബനീഞ്ഞ അനുസ്മരണ സമ്മേളനത്തിൽ പാലാ ബിഷപ് മാർ ജോസഫ് കല്ലറങ്ങാട്ട് അവാർഡുകൾ സമ്മാനിക്കും.
10,001 രൂപയും ഫലകവും പ്രശസ്തിപത്രവും അടങ്ങുന്നതാണ് ഓരോ അവാർഡും. മുപ്പത് വർഷത്തോളം ഹൈസ്കൂൾ മലയാളം അധ്യാപകനായി സേവനമനുഷ്ഠിച്ച ചാക്കോ സി പൊരിയത്ത് 2000ലാണ് വിരമിച്ചത്. 2022 മുതൽ സംസ്ഥാന ഭാഷാ മാർഗനിർദേശക സമിതി അംഗമായി പ്രവർത്തിച്ചുവരുന്നു. മഹാകവി പാലാ സ്മാരക പുരസ്കാര സമിതിയിൽ ഏഴു വർഷം അംഗമായും മൂന്നു വർഷം ജൂറിയായും പ്രവർത്തിച്ചിട്ടുണ്ട്.
ഫാ. കൊളമ്പിയർ കയത്തിൻകര പത്രപ്രവർത്തക പുരസ്കാര സമിതിയിൽ പത്ത് വർഷം അംഗമായും രണ്ടു വർഷം ജൂറിയായും സേവനമനുഷ്ഠിച്ചു. മലയാള മനോരമയുടെ 'നല്ല പാഠം' പരിപാടിയിൽ അഞ്ചു വർഷം ജില്ലാതല ജൂറിയായും പ്രവർത്തിച്ചു. രൂപതയുടെ കെ.സി.എൽ. പ്രസിദ്ധീകരണമായ കളരി മാസികയുടെ ചീഫ് എഡിറ്ററായും അഞ്ചു വർഷം സേവനമനുഷ്ഠിച്ചിട്ടുണ്ട്.
എസ്.സി.ഇ.ആർ.ടി.യുടെ മലയാള പാഠപുസ്തകത്തിൽ അക്ഷരമാല കൂട്ടിച്ചേർക്കുന്നതിനായി അക്ഷീണം പ്രവർത്തിച്ച വ്യക്തിയാണ് വാനമ്പാടി അവാർഡിന് അർഹനായ ഫാ. ഡോ. തോമസ് മൂലയിൽ. മലയാളത്തിലും ഇംഗ്ലീഷിലുമായി ഇരുപതിലേറെ ഗ്രന്ഥങ്ങളുടെ രചയിതാവാണ് അദ്ദേഹം. 'സംക്ഷേപവേദാർഥം: ഭാഷാപോഷണവും മതബോധനവും', 'വിശ്വാസക്കൈമാറ്റം: രണ്ടാം വത്തിക്കാൻ സൂനഹദോസിന് മുമ്പും പിമ്പും' എന്നിവയാണ് അദ്ദേഹത്തിന്റെ ഏറ്റവും പുതിയ കൃതികൾ.
മോൺ. ഡോ. ജോസഫ് തടത്തിൽ, ഡോ. സി. സിജി തെരേസ് സി.എം.സി., ഡോ. കുര്യാസ് കുമ്പളക്കുഴി, ഡോ. ഡേവീസ് സേവിയർ, സി. ഡോ. പവിത്ര, ഡോ. ആൻസൺ തോട്ടത്തിൽ എന്നിവരടക്കം പത്തുപേരടങ്ങുന്ന ജൂറിയാണ് അവാർഡ് ജേതാക്കളെ തെരഞ്ഞെടുത്തത്.





