കൊല്ലം: കൊല്ലത്തെ വാടിയിലെ വീട്ടില്‍ നിന്നും കള്ളനോട്ട് അച്ചടിക്കുന്ന സാമഗ്രികള്‍ പിടികൂടിയ കേസില്‍ സമഗ്ര അന്വേഷണത്തിന് പൊലീസ്.
രണ്ടര കോടിയോളം രൂപയുടെ കള്ളനോട്ട് അച്ചടിക്കാനായിരുന്നു നീക്കം. അറസ്റ്റിലായ കല്ലേലിവയല്‍ സ്വദേശി സിബിയോണിനൊപ്പം കൂടുതല്‍ കണ്ണികളുണ്ടെന്ന് നിഗമനത്തിലാണ് പൊലീസ്.
ഇന്നലെ രാത്രിയാണ് തീരദേശ മേഖലയായ വാടിയിലെ വീട്ടില്‍ നിന്ന് കള്ളനോട്ട് അച്ചടിക്കുന്ന സാമഗ്രികള്‍ പിടികൂടിയത്. സിറ്റി ഡാൻസാഫ് സംഘവും പള്ളിത്തോട്ടം പൊലീസും നടത്തിയ റെയ്ഡില്‍ പ്രിന്റററും 500 രൂപയുടെ കള്ളനോട്ട് അച്ചടിക്കാനായി മുറിച്ച പേപ്പർ കെട്ടുകളും നോട്ട് എണ്ണുന്ന യന്ത്രവും പിടിച്ചെടുത്തു. പിടിച്ചെടുത്ത പേപ്പർ കെട്ടുകളില്‍ 500 രൂപ നോട്ടിന്റെ ഡിസൈൻ പ്രിന്റ് ചെയ്തിരുന്നു
45 പവനോളം തൂക്കം വരുന്ന സ്വർണാഭരണങ്ങളും 4.32 ലക്ഷം രൂപയും കണ്ടെടുത്തു. അറസ്റ്റിലായ കല്ലേലിവയല്‍ സ്വദേശി സിബിയോണ്‍ വൻ ശൃംഖലയിലെ കണ്ണിയാണെന്ന നിഗമനത്തിലാണ് പൊലീസ്. സിബിയോണിനെ തട്ടിക്കൊണ്ടു പോയെന്ന് ഭാര്യ ദിവസങ്ങള്‍ക്ക് മുമ്പ് പൊലീസില്‍ നല്‍കിയ പരാതിയാണ് കള്ളനോട്ട് അച്ചടി കേന്ദ്രം കണ്ടെത്തുന്നതില്‍ നിർണ്ണായകമായത്. പരാതി കിട്ടിയതിന് പിന്നാലെ ഇയാള്‍ സ്‌റ്റേഷനില്‍ ഹാജരായിരുന്നു.
തട്ടിക്കൊണ്ടു പോയവർ തന്നെ വിട്ടയച്ചെന്നായിരുന്നു സിബിയോണ്‍ പറഞ്ഞത്. സിബിയോണിനെ വീട്ടില്‍ നിന്ന് വിളിച്ചിറക്കിയ ആളെ പൊലീസ് അറസ്റ്റ് ചെയ്തിരുന്നു. സിബിയോണില്‍ നിന്ന് തട്ടിയെടുത്തെന്ന് പറഞ്ഞ സ്‌കൂട്ടറും പൊലീസ് കണ്ടെടുത്തു. സിബിയോണിൻ്റെ പെരുമാറ്റത്തില്‍ സംശയം തോന്നിയ പൊലീസ് തുടരെ നിരീക്ഷണം നടത്തി. തുടർന്നാണ് ഇയാളുടെ വീട്ടില്‍ റെയ്ഡ് നടത്തിയത്. തട്ടിക്കൊണ്ടുപോകല്‍ പരാതിയും കള്ളനോട്ട് ഇടപാടും തമ്മില്‍ ബന്ധമുണ്ടോ എന്നും പൊലീസ് അന്വേഷിക്കുന്നുണ്ട്.
