കൊച്ചി: കൊച്ചി മെട്രോ രണ്ടാംഘട്ട പാതയിലെ ട്രാക്ക് നിര്‍മാണത്തിനായുള്ള റെയിലുകള്‍ കൂട്ടിയോജിപ്പിക്കുന്ന പ്രവൃത്തി അടുത്ത ആഴ്ച ആരംഭിക്കും.
കൊച്ചി മെട്രോ റെയില്‍ ലിമിറ്റഡ് (കെ.എം.ആര്‍.എല്‍.) മാനേജിംഗ് ഡയറക്ടര്‍ ജി. പ്രിയങ്കയുടെ നേതൃത്വത്തില്‍ ചേര്‍ന്ന അവലോകന യോഗത്തിലാണ് ഇതുസംബന്ധിച്ച്‌ തീരുമാനമായത്.
റെയിലുകള്‍ കൂട്ടിയോജിപ്പിക്കുന്നതിനുള്ള യന്ത്രങ്ങള്‍ കൊച്ചിയില്‍ എത്തിച്ച്‌ പരീക്ഷണ വെല്‍ഡിംഗ് പൂര്‍ത്തിയാക്കിയിട്ടുണ്ട്. ഇതിന്റെ സാമ്പിളുകള്‍ പരിശോധനയ്ക്കായി ആരക്കോണത്തെ ദക്ഷിണ റെയില്‍വേ ലബോറട്ടറിയിലേക്ക് അയക്കും.
പരിശോധനാഫലം അനുകൂലമായാല്‍ അടുത്ത ആഴ്ച തന്നെ വെല്‍ഡിംഗ് പ്രവൃത്തി ആരംഭിക്കാനാകും.
രണ്ടാംഘട്ട പാതയുടെ ഇരുദിശകളിലുമായി 13 കിലോമീറ്റര്‍ ദൈര്‍ഘ്യത്തിലുള്ള വയഡക്‌ട് നിര്‍മാണം പൂര്‍ത്തിയായി. ആകെ വയഡക്‌ട് നിര്‍മാണത്തിന്റെ 70 ശതമാനമാണ് നിലവില്‍ പൂര്‍ത്തിയായിട്ടുള്ളത്.
ബാലസ്റ്റ്‌ലെസ് ട്രാക്ക് നിര്‍മാണത്തിന് ആവശ്യമായ 44 കിലോമീറ്റര്‍ റെയിലുകള്‍ (2,700 മെട്രിക് ടണ്‍) നേരത്തേ എത്തിച്ചിരുന്നു. 18 മീറ്റര്‍ നീളമുള്ള റെയിലുകളാണ് വെല്‍ഡിംഗ് വഴി കൂട്ടിയോജിപ്പിക്കേണ്ടത്. രണ്ടാംഘട്ടത്തിനായി ആകെ 2,444 റെയിലുകളാണ് എത്തിച്ചിട്ടുള്ളത്.
കലൂര്‍ ജവഹര്‍ലാല്‍ നെഹ്‌റു സ്റ്റേഡിയം മുതല്‍ കാക്കനാട് വഴി സ്മാര്‍ട്ട് സിറ്റി വരെയുള്ള രണ്ടാംഘട്ട പാതയില്‍ ഇതുവരെ 954 കോടി രൂപയുടെ നിര്‍മാണ പ്രവര്‍ത്തനങ്ങള്‍ പൂര്‍ത്തിയാക്കി. വയഡക്ടുകള്‍ക്കൊപ്പം സ്റ്റേഷനുകളുടെ നിര്‍മാണവും പുരോഗമിക്കുകയാണ്.
ചിറ്റേത്തുകര സ്റ്റേഷന്റെ ഇരുവശങ്ങളിലെയും കിന്‍ഫ്ര പാര്‍ക്ക് സ്റ്റേഷന്റെ ഇടതുവശത്തെയും വാഴക്കാല സ്റ്റേഷന്റെ വലതുവശത്തെയും സ്ട്രക്ചറല്‍ ജോലികള്‍ പൂര്‍ത്തിയായി. മറ്റ് സ്റ്റേഷനുകളിലും നിര്‍മാണം പുരോഗമിക്കുന്നു.
സിഗ്‌നലിങ്, ടെലികോം, ലിഫ്റ്റുകള്‍, എസ്‌കലേറ്ററുകള്‍, ഓട്ടോമാറ്റിക് ഫെയര്‍ കലക്ഷന്‍ (എ.എഫ്.സി.) സംവിധാനങ്ങള്‍ എന്നിവയുമായി ബന്ധപ്പെട്ട ജോലികളും വിവിധ ഘട്ടങ്ങളിലായി നടന്നുവരികയാണ്.
