തിരുവനന്തപുരം: സംസ്ഥാന സർക്കാരിന്റെ 2027 വർഷത്തെ കലണ്ടറിന് വൻ വില്‍പ്പന.
കേവലം 13 ദിവസത്തിനുള്ളില്‍ റെക്കോർഡ് വില്‍പ്പനയാണ് രേഖപ്പെടുത്തിയിരിക്കുന്നത്. ഒക്ടോബർ 23-ന് വില്‍പ്പന ആരംഭിച്ച്‌ നവംബർ 12-വരെയുള്ള കണക്കുകള്‍ പ്രകാരം ആകെ 1,72,836 കലണ്ടറുകള്‍ വിറ്റഴിക്കപ്പെട്ടു. ഇതില്‍ 1,57,226 എണ്ണം നേരിട്ട് വിറ്റഴിച്ചു. 15,610 എണ്ണം സൗജന്യമായി വിതരണം ചെയ്തു.
ഓരോ 10 കലണ്ടറിനും ഒരു കലണ്ടർ എന്ന രീതിയിലാണ് സൗജന്യ കലണ്ടർ നല്‍കിയിട്ടുള്ളത്.
40 രൂപയാണ് സർക്കാർ കലണ്ടറിൻ്റെ വില. കഴിഞ്ഞ വർഷം മാർച്ച്‌ മാസം വരെ ആകെ 1.65 ലക്ഷം കലണ്ടറുകള്‍ മാത്രമാണ് വിറ്റഴിച്ചത്.
എന്നാല്‍ ഇത്തവണ രണ്ടാഴ്ചയ്ക്കുള്ളില്‍ കഴിഞ്ഞ വർഷത്തെ ആകെ വില്‍പ്പന മറികടക്കാൻ സാധിച്ചു. ഈ സാഹചര്യത്തില്‍ 10 ലക്ഷം കലണ്ടറുകള്‍ അച്ചടിക്കാനാണ് സർക്കാർ തീരുമാനിച്ചിരിക്കുന്നത്. ഇതുവരെ വിവിധ ഡിപ്പോകളിലായി 2,96,000 കലണ്ടറുകള്‍ എത്തിച്ചതില്‍ 1,23,164 എണ്ണം മാത്രമാണ് ഇനി സ്റ്റോക്കുള്ളത്.
നവംബർ 12 വൈകുന്നേരം വരെയുള്ള ഔദ്യോഗിക കണക്കുകള്‍ പ്രകാരം ഏറ്റവും കൂടുതല്‍ കലണ്ടറുകള്‍ വിറ്റഴിച്ചത് തിരുവനന്തപുരത്തെ ജി.സി.പി (GCP) പബ്ലിക്കേഷൻ വഴിയാണ്. ഇവിടെ നിന്നും 40,360 കലണ്ടറുകള്‍ (36,749 വില്‍പ്പന, 3,611 സൗജന്യം) വിതരണം ചെയ്തു.
ജില്ലാ ഫോറം സ്റ്റോറുകളില്‍ എറണാകുളമാണ് ഒന്നാമത്. കോട്ടയം 16396, തൃശൂർ 14001, പാലക്കാട് 13117, കോഴിക്കോട് 12665, കൊല്ലം 12594, കണ്ണൂർ 12145, ആലപ്പുഴ 9375, മലപ്പുറം 9039, പത്തനംതിട്ട 4254 മണ്ണന്തല എഫ്.എസ് 1917, കാസർകോട് 1493, വയനാട് 1281 എന്നിങ്ങനെയാണ് മറ്റ് കേന്ദ്രങ്ങളിലെ വില്‍പ്പന കണക്ക്.
ഒക്ടോബർ 30 മുതല്‍ നവംബർ 10 വരെയുള്ള 12 ദിവസങ്ങളില്‍ മാത്രം എറണാകുളത്ത് 23,615 കലണ്ടറുകള്‍ വിറ്റഴിഞ്ഞു (മുൻവർഷം ഇത് 15,998 ആയിരുന്നു). കോട്ടയത്ത് മുൻവർഷത്തെ 13,000-ല്‍ നിന്ന് 14,970 ആയും, തൃശൂരില്‍ 13,000-ല്‍ നിന്ന് 13,748 ആയും, കോഴിക്കോട് 10,000-ല്‍ നിന്ന് 12,628 ആയും, കൊല്ലത്ത് 7,000-ല്‍ നിന്ന് 12,577 ആയും, മലപ്പുറത്ത് 6,000-ല്‍ നിന്ന് 8,466 ആയും വില്‍പ്പന ഉയർന്നു.
