ന്യൂഡൽഹി : ഡല്ഹി സമരത്തിലെ പൊലീസ് നടപടിയില് പാര്ലമെന്റില് പ്രതിഷേധം തുടരാന് തീരുമാനിച്ച് കോണ്ഗ്രസ്. സമരത്തിനെത്തിയ കുട്ടികളെ പൊലീസ് പേപ്പട്ടികളെക്കാള് മോശമായിട്ട് തല്ലി തീര്ക്കുന്നത് കണ്ടിട്ട് പ്രധാനമന്ത്രി മിണ്ടാതിരിക്കുന്നത് അങ്ങേയറ്റം ലജ്ജാവഹമാണ്. അദ്ദേഹം മാപ്പ് പറയണമെന്ന് രാജ്യം ആഗ്രഹിക്കുന്നുണ്ട്. അത് പറയണമെന്ന് വീണ്ടും ആവശ്യപ്പെടുമെന്ന് കെസി വേണുഗോപാൽ എംപി വ്യക്തമാക്കി.
"ജെന്സികളെ അഭിസംബോധന ചെയ്തുകൊണ്ട് അദ്ദേഹം രണ്ട് വീഡിയോ പോസ്റ്റ് ചെയ്തല്ലോ. താങ്കളുടെ മുക്കിൻ മുന്നില് ഇത്രയും ക്രൂരമായ വിദ്യാര്ഥി വേട്ട നടന്നിട്ട് അത് തെറ്റായി പോയി എന്ന് പറയാനുള്ള ആര്ജവം പോലും കാണിച്ചിട്ടില്ല. അതിനു മാപ്പ് പറയുക തന്നെ വേണം. രാജ്യം അത് ആഗ്രഹിക്കുന്നുണ്ട്" എന്നും അദ്ദേഹം പറഞ്ഞു.
ഒരുപാട് ചോദ്യങ്ങള് ബാക്കിയുണ്ടെന്നും ആഭ്യന്തരമന്ത്രി മറുപടി പറയേണ്ട ചോദ്യങ്ങളുണ്ടെന്നും കെസി വേണുഗോപാൽ പറഞ്ഞു. വിദ്യാര്ഥി സമരം സമാനതകളില്ലാത്ത രീതിയിലാണ് ദില്ലി പൊലീസ് നേരിട്ടത്. ഈ സമരത്തില് ആഭ്യന്തരവകുപ്പ് എടുത്ത നടപടികളെല്ലാം ശക്തമായി ചോദ്യം ചെയ്യപ്പെടും. അതിനൊക്കെ ഉത്തരം കിട്ടിയിട്ട് മാത്രമേ ഈ ചര്ച്ച സുഖമായിട്ട് മുന്നോട്ട് പോകുകയുള്ളൂ. കൃത്യമായിട്ടുള്ള നടപടികള് ക്രമം എന്താണെന്ന് ഗവണ്മെന്റ് വിശദീകരിക്കേണ്ടതായിട്ടുണ്ടെന്നും കെസി വേണുഗോപാൽ കൂട്ടിച്ചേർത്തു.
