മുണ്ടക്കയം: കണ്ണിമല ഇറക്കത്തിലെ പൊലീസ് എയ്പോസ്റ്റിന്റെ സ്ഥാനം മാറ്റിയത് അപകടങ്ങള്‍ വർധിക്കുന്നതിനു കാരണമാകുമെന്ന് ആശങ്ക.
മുൻപ് പൊലീസ് എയ്ഡ് പോസ്റ്റ് സ്ഥാപിച്ചിരുന്ന സ്ഥലത്തിന് 200 മീറ്ററോളം പുറകിലേക്ക് മാറ്റി കൊടുംവളവിലാണ് ഇത്തവണ എയ്ഡ് പോസ്റ്റ് സ്ഥാപിച്ചിരിക്കുന്നത്. കൊടുംവളവും ഇറക്കവും നിറഞ്ഞ ഈ ഭാഗത്ത് വാഹനങ്ങള്‍ വേഗത്തില്‍ എത്തുമ്പോള്‍ എയ്ഡ് പോസ്റ്റില്‍ നിർദേശം നല്‍കുന്നതിന് വാഹനങ്ങള്‍ തടഞ്ഞുനിർത്തിയാല്‍ ഇത് അപകടങ്ങള്‍ വർധിക്കാൻ ഇടയാക്കുമെന്ന ആക്ഷേപം ഉയരുന്നുണ്ട്.
കൂടാതെ, ആംബുലൻസ് അടക്കമുള്ള വാഹനങ്ങള്‍ വീതി കുറഞ്ഞ റോഡിന്റെ ഈ ഭാഗത്ത് പാർക്ക് ചെയ്യുന്നതും അപകടങ്ങള്‍ക്കിടയാക്കും.
ഓരോ തീർഥാടനകാലത്തും നിരവധി അപകടങ്ങള്‍ സംഭവിക്കാറുള്ള സ്ഥലമാണ് മുണ്ടക്കയം-എരുമേലി റോഡിലെ കണ്ണിമല വളവ്. വഴി പരിചയമില്ലാത്ത, അന്യസംസ്ഥാനങ്ങളില്‍നിന്നുള്ള തീർഥാടകരാണ് കൂടുതലും അപകടത്തില്‍പ്പെടുന്നത്.
കുത്തിറക്കമിറങ്ങിവരുന്ന വാഹനം കൊടുംവളവില്‍ തിരിയാതെവരുമ്പോള്‍ സമീപത്തെ കുഴിയിലേക്ക് മറിയുകയാണു പതിവ്. കഴിഞ്ഞ തീർഥാടനകാലത്തും ഇവിടെ ശബരിമല തീർഥാടകർ അപകടത്തില്‍പ്പെട്ടിരുന്നു.
അപകടങ്ങള്‍ പതിവായതോടെ കണ്ണിമല ഇറക്കം തുടങ്ങുന്ന സിഗ്നല്‍ ലൈറ്റ് ഭാഗത്ത് പൊലീസ് എയ്ഡ്പോസ്റ്റ് സ്ഥാപിച്ച്‌ തീർഥാടന വാഹനങ്ങള്‍ തടഞ്ഞുനിർത്തി ഡ്രൈവർമാർക്ക് നിർദേശം നല്‍കിയാണ് യാത്ര തുടരാൻ അനുവദിക്കുന്നത്. ഇതുവഴി മേഖലയിലെ അപകടങ്ങള്‍ ഒരു പരിധിവരെ കുറയ്ക്കാനും സാധിച്ചിരുന്നു.
അത്യാവശ്യഘട്ടത്തില്‍ ഉപയോഗിക്കാനായി ആംബുലൻസ് സൗകര്യം അടക്കം ഇവിടെ ക്രമീകരിച്ചിരുന്നു.
