തിരുവനന്തപുരം: പാറശ്ശാല പരശുവയ്ക്കലില്‍ പട്ടാപ്പകല്‍ വയോധികയുടെ മാല പൊട്ടിച്ചെടുത്ത് രക്ഷപ്പെടാൻ ശ്രമിച്ച മോഷ്ടാവിനെ കെണിവെച്ചു വീഴ്ത്തി വീട്ടമ്മ.
ചെങ്കല്‍ വില്ലേജില്‍ ആറയൂർ ചാവല്ലൂർ പൊറ്റ കരിമണ്‍വിള വീട്ടില്‍ വിജയദാസ് (40) ആണ് പിടിയിലായത്.
ബുധനാഴ്ച ഉച്ചയ്ക്ക് രണ്ടുമണിയോടെ പരശുവയ്ക്കല്‍ ആടുമൻകാട് ആടുവളർത്തല്‍ കേന്ദ്രത്തിന് സമീപത്തെ ഇടറോഡിലാണ് നാടകീയ സംഭവങ്ങള്‍ അരങ്ങേറിയത്. പ്രദേശവാസിയായ കുഴിപ്പഴിഞ്ഞി വീട്ടില്‍ പ്രസന്നകുമാരി (61) വഴിയിലൂടെ നടന്നുപോകുമ്പോഴായിരുന്നു സംഭവം.
കെ.എല്‍.19 എച്ച്‌ 9291 നമ്പറിലുള്ള സ്‌കൂട്ടറിലെത്തിയ വിജയദാസ് വാഹനം റോഡരികില്‍ ഒതുക്കിനിർത്തിയ ശേഷം കാല്‍നടയായി പ്രസന്നകുമാരിയുടെ അടുത്തേക്ക് നീങ്ങുകയായിരുന്നു. തുടർന്ന് ഇവരുടെ കഴുത്തില്‍ കിടന്ന മാല പൊട്ടിച്ചെടുത്ത് സ്‌കൂട്ടറില്‍ കയറി അതിവേഗം കടന്നുകളയാനായിരുന്നു പദ്ധതി. എന്നാല്‍ ഒരുമുഴം മുന്നേയെറിഞ്ഞ പ്രസന്നകുമാരി മോഷ്ടാവിനെ ചെറുക്കുകയും ഇയാള്‍ രക്ഷപ്പെടാൻ നോക്കിയ സ്കൂട്ടർ സമീപത്തെ തോട്ടിലേക്ക് തള്ളിയിടുകയും ചെയ്തു.
വാഹനം തോട്ടിലേക്ക് മറിഞ്ഞതോടെ മോഷ്ടാവ് കാല്‍നടയായി ഓടിരക്ഷപ്പെടാൻ ശ്രമിച്ചെങ്കിലും പ്രസന്നകുമാരിയുടെ നിലവിളി കേട്ട് ഓടിയെത്തിയ നാട്ടുകാർ വളഞ്ഞുപിടികൂടുകയായിരുന്നു. നാട്ടുകാർ വിവരം അറിയിച്ചതിനെ തുടർന്ന് പാറശ്ശാല പോലീസ് സ്ഥലത്തെത്തി പ്രതിയെ കസ്റ്റഡിയിലെടുത്തു. തോട്ടില്‍ വീണ സ്‌കൂട്ടറും പോലീസ് കണ്ടെടുത്തു. മേഖലയില്‍ മുൻപും സമാനരീതിയിലുള്ള മോഷണശ്രമങ്ങള്‍ നടന്നിട്ടുണ്ടോയെന്ന് പോലീസ് പരിശോധിച്ചുവരികയാണ്.
