തൃശൂർ : ഗുരുവായൂർ ക്ഷേത്രദർശനത്തിനായി ഇനി ഓണ്ലൈൻ ബുക്കിങ് . സൗകര്യപ്രദമായ സ്ലോട്ട് ബുക്ക് ചെയ്ത് ദര്ശനം നടത്തുന്നതിനുള്ള ഓണ്ലൈന് സേവനം വരുന്നു. ഹൈക്കോടതി നിർദ്ദേശത്തെ തുടർന്നാണ് ദർശനത്തിന് ഓണ്ലൈൻ സംവിധാനം ഏർപ്പെടുത്താൻ ഭരണ സമിതി തീരുമാനിച്ചത്. ഓഗസ്റ്റ് 4 മുതല് ഇത് പ്രാബല്യത്തില് വരും.
പരീക്ഷണാടിസ്ഥാനത്തില് ചൊവ്വാഴ്ചയും വ്യാഴാഴ്ചയുമാണ് ആദ്യം വെര്ച്വല് ക്യൂ ബുക്കിങ് നടപ്പിലാക്കുക. ദേവസ്വത്തിന്റെ ഔദ്യോഗിക വെബ്സെറ്റില് ഇതിനായി ബുക്ക് ചെയ്യാം. ബുക്കിംഗ് നടത്തിയതിന്റെ പകർപ്പ് ഡൗണ്ലോഡ് ചെയ്ത് ആധാർ കാർഡുമായി ക്ഷേത്രനടയില് എത്തി സെക്യൂരിറ്റി ജീവനക്കാരെ കാണിക്കണം.
ഓണ്ലൈൻ ബുക്കിംഗ് സംവിധാനം ചെയ്തവർക്ക് പ്രത്യേക നിരയായി സംവിധാനം ഒരുക്കും. രാവിലെ ഏഴു മുതല് 10 വരെയും ഉച്ചയ്ക്ക് 12 മുതല് ഒന്നു വരെയും വൈകിട്ട് നാലു മുതല് അഞ്ചു വരെയുമാണ് ഓണ്ലൈൻ വഴി ബുക്ക് ചെയ്തവർക്ക് ദർശന സമയം അനുവദിച്ചിരിക്കുന്നത്.ഓരോ മണിക്കൂറിലും 300 പേർക്കാണ് ദർശനം. ഓരോ സ്ലോട്ടിലും ആറു പേർക്ക് വരെ ബുക്ക് ചെയ്യാം. ഈ സേവനം വഴി ദിവസവും 2400 പേർക്ക് ദർശനം നടത്താനാകുമെന്നാണ് പ്രതീക്ഷ.
