ആലുവ: ട്രെയിന്‍ മാര്‍ഗം കടത്തിക്കൊണ്ടുവന്ന 19 ലക്ഷം രൂപ വിലമതിക്കുന്ന 37.700 കിലോ കഞ്ചാവ് ആര്‍പിഎഫ് പിടികൂടി.
വ്യാഴാഴ്ച വിവേക് എക്സ്പ്രസ് ആലുവ റെയില്‍വേ സ്റ്റേഷനില്‍ എത്തിയപ്പോള്‍ നടത്തിയ പരിശോധനയിലാണ് ജനറല്‍ കോച്ചില്‍ ആളില്ലാത്ത നിലയില്‍ കഞ്ചാവ് കണ്ടെത്തിയത്.
നാല് ചാക്കുകളിലായി ശര്‍ക്കര പൊതിഞ്ഞ നിലയിലായിരുന്നു കഞ്ചാവ് സൂക്ഷിച്ചിരുന്നത്. പുറമേ ശര്‍ക്കരയാണെന്ന് തോന്നിപ്പിക്കും വിധത്തിലായിരുന്നെങ്കിലും, വിശദമായി പരിശോധിച്ചപ്പോഴാണ് അതിനുള്ളില്‍ ഒളിപ്പിച്ച നിലയില്‍ കഞ്ചാവ് കണ്ടെത്തിയത്.
സംഭവവുമായി ബന്ധപ്പെട്ട് പ്രതികളെ ഇതുവരെ കണ്ടെത്താനായിട്ടില്ല. പിടിച്ചെടുത്ത കഞ്ചാവ് തുടര്‍നടപടികള്‍ക്കായി ആലുവ എക്സൈസ് വിഭാഗത്തിന് കൈമാറി.
ദീപാവലി ആഘോഷങ്ങളോടനുബന്ധിച്ച്‌ ട്രെയിനുകളിലും റെയില്‍വേ സ്റ്റേഷനുകളിലും പരിശോധന കൂടുതല്‍ ശക്തമാക്കുമെന്ന് ആര്‍പിഎഫ് സീനിയര്‍ ഡിവിഷണല്‍ സെക്യൂരിറ്റി കമ്മീഷണര്‍ അറിയിച്ചു.
ആര്‍പിഎഫ് സീനിയര്‍ ഡിവിഷനല്‍ സെക്യൂരിറ്റി കമ്മിഷണര്‍ മുഹമ്മദ് ഹനീഫിന്റെ നിര്‍ദേശപ്രകാരം, ആര്‍പിഎഫ് ക്രൈം ഇന്റലിജന്‍സ് ബ്രാഞ്ച് തിരുവനന്തപുരം ഇന്‍സ്പെക്ടര്‍ ജിപിന്‍ എ.ജെയുടെ മേല്‍നോട്ടത്തില്‍ എഎസ്‌ഐമാരായ സിജോ സേവ്യര്‍, വിജയകുമാര്‍, ഹെഡ് കോണ്‍സ്റ്റബിള്‍ വിപിന്‍, കോണ്‍സ്റ്റബിള്‍ നിഖില്‍ എന്നിവരടങ്ങിയ സംഘമാണ് ഈ റെയ്ഡിന് നേതൃത്വം നല്‍കിയത്.
