കോഴിക്കോട്: സാമൂഹ്യ മാധ്യമത്തിലൂടെ മുഖ്യമന്ത്രിയെ അപകീർത്തിപ്പെടുത്തിയെന്ന കേസില് ബേപ്പൂർ സ്വദേശിയായ യുവാവിനെ കോഴിക്കോട് സൈബർ പൊലീസ് അറസ്റ്റ് ചെയ്തു. ബേപ്പൂർ കക്കേടം സ്വദേശി നിതിൻ എന്ന 28 കാരനെയാണ് അറസ്റ്റ് ചെയ്തത്.
മുഖ്യമന്ത്രി വി.ഡി. സതീശന്റെ ഹെലികോപ്റ്റർ യാത്രയുമായി ബന്ധപ്പെട്ട് ഫേസ്ബുക്കില് മോശം പരാമർശം നടത്തിയെന്നാണ് കേസ്.
ബേപ്പൂർ ബ്ലോക്ക് കോണ്ഗ്രസ് കമ്മിറ്റി അംഗം നല്കിയ പരാതിയുടെ അടിസ്ഥാനത്തിലാണ് സൈബർ പൊലീസ് കേസ് രജിസ്റ്റർ ചെയ്തത്. കമന്റ് സമൂഹത്തില് ഭിന്നതയുണ്ടാക്കാനും പൊതുസമാധാനം തകർക്കാനും ഉദ്ദേശിച്ചുള്ളതാണെന്ന് പരാതിക്കാരൻ ആരോപിച്ചു.
പരാതി ലഭിച്ചയുടൻ കോഴിക്കോട് സൈബർ ക്രൈം പൊലീസ് സ്റ്റേഷനിലെ സംഘം നിതിന്റെ ഫേസ്ബുക്ക് പ്രൊഫൈല് പരിശോധിച്ചു. സാങ്കേതിക പരിശോധനയില് വിവാദ കമന്റ് പോസ്റ്റ് ചെയ്തത് നിതിൻ തന്നെയാണെന്ന് സ്ഥിരീകരിച്ചു.
"പൊതു സമൂഹത്തില് ലഹളയുണ്ടാക്കണമെന്ന ഉദ്ദേശത്തോടെ" കമന്റ് ഇട്ടുവെന്നാണ് എഫ്ഐആറില് രേഖപ്പെടുത്തിയിരിക്കുന്നത്. ഇന്ത്യൻ ശിക്ഷാ നിയമത്തിലെയും ഐടി ആക്ടിലെയും പ്രസക്ത വകുപ്പുകള് പ്രകാരമാണ് കേസെടുത്തിരിക്കുന്നത്.
കോഴിക്കോട് സൈബർ എസിപിയുടെ നേതൃത്വത്തിലുള്ള പ്രത്യേക സംഘമാണ് നിതിനെ ബേപ്പൂരിലെ വീട്ടില് നിന്ന് കസ്റ്റഡിയിലെടുത്തത്. ചോദ്യം ചെയ്യലിന് ശേഷം അറസ്റ്റ് രേഖപ്പെടുത്തി കോടതിയില് ഹാജരാക്കി.
സാമൂഹ്യ മാധ്യമങ്ങളിലൂടെ ജനപ്രതിനിധികള്ക്കും ഭരണഘടനാ സ്ഥാനങ്ങളില് ഇരിക്കുന്നവർക്കുമെതിരെ അപകീർത്തികരമായ പ്രചരണങ്ങള് നടത്തുന്നവർക്കെതിരെ കർശന നടപടി സ്വീകരിക്കുമെന്ന് സൈബർ പൊലീസ് അറിയിച്ചു. അഭിപ്രായ സ്വാതന്ത്ര്യം എന്ന പേരില് വ്യക്തിപരമായ അധിക്ഷേപങ്ങളും വ്യാജപ്രചരണങ്ങളും അനുവദിക്കാനാവില്ലെന്ന് അധികൃതർ വ്യക്തമാക്കി.
