എരുമേലി: എരുമേലിയിലെ പാർക്കിംഗ് ഗ്രൗണ്ടുകളിലെ നിരക്കുകൾ ഏകീകരിക്കണമെന്ന്ശിവസേന കോട്ടയം ജില്ലാ കമ്മിറ്റി പ്രസിഡന്റ് കെ. എസ്. അജിത് കുമാർ കൈലാത്ത് ആവശ്യപ്പെട്ടു.
ദേവസ്വം ബോർഡിന്റെ പാർക്കിംഗ് ഗ്രൗണ്ടിലും പഴയ പാർക്കിംഗ് ഗ്രൗണ്ടിലും സ്വകാര്യ വ്യക്തികൾ നടത്തുന്ന പാർക്കിംഗ് ഗ്രൗണ്ടുകളിലും വ്യത്യസ്ത നിരക്കുകളാണ് ഈടാക്കുന്നത്. ഇത് ശബരിമല തീർഥാടകരെയും എരുമേലിയിലെത്തുന്ന മറ്റു യാത്രക്കാരെയും ഒരുപോലെ ബുദ്ധിമുട്ടിക്കുന്നുണ്ട്.
പാർക്കിംഗ് നിരക്കുകളിലെ ഈ വ്യത്യാസം ഒഴിവാക്കി എല്ലാ പാർക്കിംഗ് ഗ്രൗണ്ടുകളിലും ഏകീകൃത നിരക്ക് നടപ്പാക്കാൻ ബന്ധപ്പെട്ട അധികൃതർ നടപടി സ്വീകരിക്കണമെന്നും നിരക്കുകൾ പ്രദർശിപ്പിക്കണമെന്നും ശിവസേന ആവശ്യപ്പെട്ടു.





