തിരുവനന്തപുരം : സിഎംആര്എല്-എക്സാലോജിക് സാമ്പത്തിക ഇടപാട് കേസില് വാര്ത്താക്കുറിപ്പ് ഇറക്കിയത് സ്വാഭാവിക നടപടിയെന്ന് ഇഡി. റെയ്ഡിന് പിന്നാലെ വാര്ത്താക്കുറിപ്പ് ഇറക്കുന്നത് അസാധാരണമല്ലെന്നും ഇഡി വിശദീകരിച്ചു. അനധികൃത പണമിടപാടുകളില് വീണക്കെതിരെ കൃത്യമായ തെളിവുകളുണ്ടെന്നും ഇതിന്റെ അടിസ്ഥാനത്തിലാണ് വാര്ത്താക്കുറിപ്പില് പരാമര്ശങ്ങള് നടത്തിയതെന്നും ഇഡി വ്യക്തമാക്കി.
കേസില് കുടൂതല് ചോദ്യം ചെയ്യലുകള് ഉടന് നടക്കുമെന്നും ഇഡി പറഞ്ഞു. വീണക്കെതിരെ വാര്ത്താക്കുറിപ്പ് ഇറക്കിയത് അസാധാരണ നടപടി ആണെന്ന് പ്രതിപക്ഷ നേതാവ് പിണറായി വിജയന് പ്രതികരിച്ചിരുന്നു. ഇതിന് പിന്നാലെയാണ് വാര്ത്താക്കുറിപ്പില് ഇഡിയുടെ വിശദീകരണം.
തന്റെ മകളായതുകൊണ്ട് വിചിത്രമായ നടപടികള് നേരിടേണ്ടി വരുന്നുവെന്നും ആ ചെറുപ്പക്കാരി വലിയ സ്വത്തിന് ഉടമയൊന്നുമല്ലെന്നും പിണറായി വിജയൻ മാധ്യമങ്ങളോട് പറഞ്ഞിരുന്നു. താനോ തന്റെ മകളോ ഒരു ഹവാല ഏര്പ്പാടിനും നിന്നിട്ടില്ലെന്നും ഇഡിയുടെ നടപടികള് വിചിത്രമാണെന്നും പിണറായി വിജയന് പറഞ്ഞിരുന്നു.
അതേസമയം കേസുമായി ബന്ധപ്പെട്ട് വീണ വിദേശത്തേക്ക് പണം അയച്ചതിന്റെ തെളിവുകൾ ലഭിച്ചതായാണ് ഇഡി പുറത്തിറക്കിയ ഔദ്യോഗിക വാർത്താക്കുറിപ്പിൽ വ്യക്തമാക്കിയത്. ഇതേ തുടർന്ന് കേസില് വീണയെ ചോദ്യം ചെയ്യാന് ഒരുങ്ങുകയാണ് അന്വേഷണ സംഘം. ഹാജാരാകാന് ആവശ്യപ്പെട്ട് സമന്സ് അയക്കാനാണ് തീരുമാനം.
