കൊച്ചി: സിഎംആർഎല് - എക്സാലോജിക് കേസില് വീണ്ടും ചോദ്യം ചെയ്യലിലേക്ക് കടക്കാൻ എൻഫോഴ്സ്മെന്റ് ഡയറക്ടറേറ്റ് (ഇഡി).
മുന് മന്ത്രി മുഹമ്മദ് റിയാസിന്റെ സുഹൃത്തുക്കള്ക്ക് ചോദ്യം ചെയ്യലിന് ഹാജരാകാന് ഇഡി നോട്ടീസ് നല്കി. നിഖില്, ഷൈജല്, ഹസൻ, വാരിസ് അടക്കമുള്ളവർക്കാണ് നോട്ടീസ് നല്കിയത്. ഈ മാസം അവസാനം ചോദ്യം ചെയ്യലിന് ഹാജരാകാനാണ് നിർദേശം നല്കിയിരിക്കുന്നത്.
ഹൈക്കോടതി സ്റ്റേ ചെയ്തത് വിജിലൻസ് കേസിന്റെ നടപടികള് മാത്രമെന്നാണ് ഇഡി അറിയിക്കുന്നത്. സിഎംആർഎല് എക്സാലോജിക്കുമായി ബന്ധപ്പെട്ട് രജിസ്റ്റർ ചെയ്ത ആദ്യ കേസിലാണ് ചോദ്യം ചെയ്യാനായി നോട്ടീസ് നല്കിയിട്ടുള്ളത്. ആദ്യ ഘട്ട കുറ്റപത്രം ഉടൻ സമർപ്പിക്കുമെന്നും ഇഡി അറിയിച്ചു. അതേസമയം, നാളെ ഹാജരാകാൻ ആകില്ലെന്ന് റിയാസിന്റെ സുഹൃത്ത് വാരിഷ് ഇഡിയെ അറിയിച്ചു. ചോദ്യം ചെയ്യലിന് ഹാജരാകാന് സാവകാശം തേടി കൊണ്ട് ഇഡിയ്ക്ക് വാരിഷ് മറുപടി നല്കി. അപകടം പറ്റി ചികിത്സയില് ആയതിനാല് കൂടുതല് സാവകാശം വേണമെന്നാണ് വാരിഷിന്റെ ആവശ്യം. ഹൈക്കോടതിയിലെ കേസിന്റെ സ്റ്റേയും മറുപടിയില് ചൂണ്ടിക്കാട്ടി. ഷൈജലും നാളെ ഹാജരാകില്ല. അടിയന്തര യാത്രയായതിനാല് കൂടുതല് സാവകാശം വേണമെന്നാണ് ഷൈജല് മറുപടി നല്കിയിരിക്കുന്നത്.






