കോട്ടയം: മോട്ടർ വാഹന വകുപ്പിന്റെ ഗതാഗത നിയമലംഘനങ്ങളുടെ പിഴ
അടയ്ക്കാനെന്ന പേരിൽ വ്യാജ ഇ ചെല്ലാൻ സന്ദേശങ്ങളയച്ച് പണം തട്ടുന്ന സൈബർ സംഘങ്ങൾ സജീവം.
മോട്ടോർ വാഹന വകുപ്പിന്റെയും പൊലീസിന്റെയും ഔദ്യോഗിക അറിയിപ്പുകൾക്ക് സമാനമായ
രീതിയിലാണ് വാട്ട്സാപ്പിലും എസ്.എം.എസായും തട്ടിപ്പുകാർ ലിങ്കുകൾ അയയ്ക്കുന്നത്.
പിഴയുണ്ടെന്ന സന്ദേശം കണ്ട് ലിങ്കിൽ കയറി പണമടയ്ക്കാൻ ശ്രമിക്കുന്നവർ തട്ടിപ്പിനിരയാകുന്ന സംഭവങ്ങൾ വർദ്ധിക്കുകയാണ്.
ഔദ്യോഗിക അറിയിപ്പുകളെന്ന് തോന്നിപ്പിക്കുന്ന വ്യാജ ലിങ്കുകളിലൂടെ വ്യക്തിഗത വിവരങ്ങളും ബാങ്ക് വിവരങ്ങളും കൈക്കലാക്കുകയും തട്ടിപ്പുകാരുടെ ലക്ഷ്യമാണ്.
ദിവസവും നൂറുകണക്കിന് ആളുകൾക്ക് ഇത്തരം സന്ദേശങ്ങൾ ലഭിക്കുന്നുണ്ട്.
പലരും ലിങ്കുകളിൽ പ്രവേശിച്ച് പണം നഷ്ടപ്പെടുത്തുന്നുമുണ്ട്
അതിനാൽ ജാഗ്രത പാലിക്കണമെന്ന് അധികൃതർ മുന്നറിയിപ്പ് നൽകുന്നു.
വാഹനത്തിന് ട്രാഫിക് നിയമലംഘനത്തിന് പിഴ ചുമത്തിയിട്ടുണ്ടെന്നും അടച്ചില്ലെങ്കിൽ നിയമനടപടി സ്വീകരിക്കുമെന്നും ഭീഷണിപ്പെടുത്തിയാണ് സന്ദേശങ്ങൾ അയയ്ക്കുന്നത്.തട്ടിപ്പ് പിടികിട്ടി കോട്ടയം സ്വദേശി രക്ഷപ്പെട്ടു.
കോട്ടയം സ്വദേശിക്ക് മാസങ്ങൾക്കുമുമ്പ് കോപാസഞ്ചർ സീറ്റിൽ യാത്ര ചെയ്തയാൾ സീറ്റ് ബെൽറ്റ് ധരിക്കാത്തതിന് 500 രൂപ പിഴയുണ്ടെന്നായിരുന്നു വാട്ട്സാപ്പ് സന്ദേശം.
സന്ദേശത്തോടൊപ്പമുള്ള ലിങ്കിൽ കയറി പണമടയ്ക്കാൻ ശ്രമിച്ചപ്പോൾ പിഴത്തുക 1,399 രൂപയായി ഉയർന്നു.
24 മണിക്കൂറിനുള്ളിൽ പണമടച്ചാൽ 75 രൂപ ഇളവ് ലഭിക്കുമെന്നും അറിയിപ്പുണ്ടായിരുന്നു. ഗൂഗിൾ പേ വഴി പണമടയ്ക്കാൻ ശ്രമിച്ചപ്പോൾ മറ്റ് ആപ്പുകൾ ഉപയോഗിക്കണമെന്ന സന്ദേശമാണ് ലഭിച്ചത്.
സംശയം തോന്നിയതോടെ തട്ടിപ്പാണെന്ന് തിരിച്ചറിഞ്ഞ് പണമടയ്ക്കാതെ പിൻമാറുകയായിരുന്നു.
പണമടയ്ക്കാം ജാഗ്രതയോടെ:
മോട്ടോർ വാഹന വകുപ്പിന്റെയോ പൊലീസിന്റെയോ ഇചെല്ലാൻ പിഴ പരിശോധിക്കുന്നതിനും അടയ്ക്കുന്നതിനും കേന്ദ്ര ഗതാഗത മന്ത്രാലയത്തിന്റെ ഔദ്യോഗിക വെബ്സൈറ്റായ https://echallan.parivahan.gov.in മാത്രം ഉപയോഗിക്കുക
പിഴയടയ്ക്കാനെന്ന പേരിൽ ലഭിക്കുന്ന ലിങ്കുകളിൽ പ്രവേശിക്കരുത്.
പുറത്തുനിന്നുള്ള ആപ്പുകളോ ഫയലുകളോ ഫോണിൽ ഇൻസ്റ്റാൾ ചെയ്യരുത്.
ഇചെല്ലാൻ തട്ടിപ്പിലൂടെ പണം നഷ്ടപ്പെട്ടാൽ ഒട്ടും വൈകാതെ 1930 എന്ന സൈബർ ഹെൽപ്പ്ലൈൻ നമ്പറിൽ വിളിച്ച് പരാതി നൽകണം.
ആദ്യ മണിക്കൂറുകളിൽ തന്നെ പരാതി നൽകുന്നത് പണം തിരിച്ചുപിടിക്കാനുള്ള സാദ്ധ്യത വർദ്ധിപ്പിക്കും.






