തിരുവനന്തപുരം: ഡ്രൈവിംഗ് ലൈസൻസ് ടെസ്റ്റുകളിലെ കാലതാമസത്തെ തുടർന്ന് ഉയർന്ന പരാതികള്ക്ക് പിന്നാലെ മോട്ടോർ വാഹന വകുപ്പിന്റെ താല്ക്കാലിക ക്രമീകരണങ്ങള്.
അടുത്ത മൂന്ന് മാസത്തേക്ക് ആഴ്ചയില് അഞ്ച് പ്രവൃത്തി ദിവസങ്ങളിലും ഡ്രൈവിംഗ് ടെസ്റ്റുകള് നടത്തും. പ്രതിദിന ഡ്രൈവിംഗ് ടെസ്റ്റ് സ്ലോട്ടുകളുടെ എണ്ണം 50 ആയി ഉയർത്താനും തീരുമാനിച്ചു. ലേണേഴ്സ് ലൈസൻസ് ടെസ്റ്റുകളും മൂന്ന് മാസത്തേക്ക് ആഴ്ചയില് അഞ്ച് പ്രവൃത്തി ദിവസങ്ങളില് നടത്തും. ലേണേഴ്സ് ടെസ്റ്റിനായി ഫേഷ്യല് റെക്കഗ്നിഷൻ അധിഷ്ഠിത ഓതന്റിക്കേഷൻ സംവിധാനം നടപ്പാക്കും.
പുതിയ ഡ്രൈവിംഗ് ലൈസൻസ് ടെസ്റ്റ് സ്ലോട്ടുകള് ബുക്കിംഗ് തീയതി മുതല് 30 ദിവസത്തിനുള്ളിലും, റീ-ടെസ്റ്റ് സ്ലോട്ടുകള് എട്ടാം ദിവസത്തിനുള്ളിലും, ലേണേഴ്സ് ലൈസൻസ് ടെസ്റ്റ് സ്ലോട്ടുകള് മൂന്ന് ദിവസത്തിനുള്ളിലും ലഭ്യമാക്കാനാണ് തീരുമാനം. നിലവിലെ കാലതാമസം കുറയ്ക്കുന്നതിനായുള്ള താല്ക്കാലിക നടപടികളാണിവയെന്നും, ക്രമീകരണങ്ങളുടെ മേല്നോട്ടത്തിന് ഡെപ്യൂട്ടി ട്രാൻസ്പോർട്ട് കമ്മീഷണറെ ചുമതലപ്പെടുത്തിയതായും മോട്ടോർ വാഹന വകുപ്പ് അറിയിച്ചു.
