തിരുവനന്തപുരം: നടൻ ഫഹദ് ഫാസിലിനെ കേന്ദ്രകഥാപാത്രമാക്കി ഒരുങ്ങുന്ന ബിഗ് ബജറ്റ് ഫാന്റസി എന്റർടെയിനർ 'ഡോൺട്ട് ട്രബിള് ദ ട്രബിള്' എന്ന ചിത്രത്തിന്റെ ടീസർ പുറത്തിറങ്ങി. സംവിധായകൻ എസ്. എസ്. രാജമൗലിയുടെ ആർക്കാ മീഡിയ വർക്ക്സും ഷോവിങ് ബിസിനസ്സ് ബാനറും ചേർന്നാണ് ചിത്രം നിർമ്മിക്കുന്നത്. നവാഗതനായ ശശാങ്ക് യെലേട്ടിയാണ് സംവിധാനം.
'പ്രേമലു' എന്ന ചിത്രത്തിന്റെ വിജയകരമായ വിതരണത്തിന് ശേഷം നിർമ്മാണരംഗത്തേക്ക് കടന്ന എസ്. എസ്. കാർത്തികേയ, ഷോബു യാർലഗഡ്ഡ, പ്രസാദ് ദേവിനേനി എന്നിവരാണ് ചിത്രത്തിന്റെ നിർമ്മാതാക്കൾ. ഫാന്റസി, ഹ്യൂമർ, വൈകാരിക മുഹൂർത്തങ്ങൾ എന്നിവ സമന്വയിപ്പിച്ച വ്യത്യസ്തമായ സിനിമാനുഭവമാണ് ചിത്രം വാഗ്ദാനം ചെയ്യുന്നതെന്ന് അണിയറപ്രവർത്തകർ അറിയിച്ചു.
ചിത്രത്തിന്റെ മുഴുവൻ അണിയറപ്രവർത്തകരുടെയും സാന്നിധ്യത്തിൽ നടന്ന ചടങ്ങിലാണ് ടീസർ പുറത്തിറക്കിയത്. ഒരു കൊച്ചു പെൺകുട്ടിക്കായി മാജിക് അവതരിപ്പിക്കുന്ന കഥാപാത്രമായാണ് ടീസറിൽ ഫഹദ് ഫാസിൽ എത്തുന്നത്. പെൺകുട്ടിയെ അപ്രത്യക്ഷയാക്കുന്ന മാജിക് കാണിക്കാമെന്ന വാഗ്ദാനത്തിന് പിന്നാലെ കഥാപാത്രത്തിന്റെ ജീവിതത്തിൽ സംഭവിക്കുന്ന അപ്രതീക്ഷിത വഴിത്തിരിവുകളാണ് ടീസർ സൂചിപ്പിക്കുന്നത്.
ഫഹദ് ഫാസിലിന്റെ പതിവിൽനിന്ന് വ്യത്യസ്തമായ ഹാസ്യചായമുള്ള കഥാപാത്രാവതരണവും ബാലതാരത്തിന്റെ പ്രകടനവും ടീസറിലെ പ്രധാന ആകർഷണങ്ങളാണ്. കാല ഭൈരവയുടെ പശ്ചാത്തല സംഗീതവും മികച്ച ഛായാഗ്രഹണവും ദൃശ്യങ്ങൾക്ക് കൂടുതൽ മികവ് നൽകുന്നുണ്ട്. 'ഡോൺട്ട് ട്രബിള് ദ ട്രബിള്' 2026 സെപ്റ്റംബർ 11-ന് ലോകമെമ്പാടുമുള്ള തിയേറ്ററുകളിൽ റിലീസ് ചെയ്യും.
