തിരുവനന്തപുരം: കേരളത്തിലെ തിരഞ്ഞെടുപ്പ് തിരിച്ചടിക്ക് പിന്നാലെ പാർട്ടിയിൽ തിരുത്തൽ നടപടികൾ അനിവാര്യമാണെന്നും നേതൃമാറ്റ സാധ്യത തള്ളിക്കളയാനാകില്ലെന്നും സിപിഐഎം ജനറൽ സെക്രട്ടറി എം.എ. ബേബി. സെപ്തംബറിൽ ചേരുന്ന വിശാല സംസ്ഥാന സമിതിയാണ് തിരുത്തൽ നടപടികളും നേതൃമാറ്റവുമായി ബന്ധപ്പെട്ട വിഷയങ്ങളും തീരുമാനിക്കുകയെന്ന് അദ്ദേഹം പറഞ്ഞു.
കേരളത്തിൽ സ്ഥാനാർഥി നിർണയത്തിലും തെരഞ്ഞെടുപ്പ് പ്രചാരണത്തിലും വീഴ്ചകൾ സംഭവിച്ചുവെന്ന് എം.എ. ബേബി സമ്മതിച്ചു. പാർട്ടി നയങ്ങളും നിലപാടുകളും ജനങ്ങളിലേക്ക് വ്യക്തമായി എത്തിക്കുന്നതിൽ ജാഗ്രതക്കുറവ് ഉണ്ടായെന്നും അത് തിരിച്ചടിക്ക് പ്രധാന കാരണമായെന്നും അദ്ദേഹം വ്യക്തമാക്കി.
ജയം ഉറപ്പിച്ചെന്ന പ്രതീതിയിലുണ്ടായ പ്രചാരണ രീതിയും സ്ഥാനാർഥി നിർണയത്തിലെ പാളിച്ചകളും തിരിച്ചടിക്ക് വഴിവെച്ചതായി സിപിഐഎം കേന്ദ്രകമ്മിറ്റി വിലയിരുത്തിയെന്ന് അദ്ദേഹം പറഞ്ഞു. പാർട്ടി എന്തിനുവേണ്ടിയാണ് നിലകൊള്ളുന്നതെന്ന് ജനങ്ങളെ ബോധ്യപ്പെടുത്തുന്നതിൽ വീഴ്ച സംഭവിച്ചതും തോൽവിക്ക് കാരണമായതായി അദ്ദേഹം ചൂണ്ടിക്കാട്ടി.
പാർട്ടിയിലെ വീഴ്ചകളെക്കുറിച്ച് എല്ലാവരും സ്വയംവിമർശനം നടത്തണമെന്നും നേതാക്കളുടെ ധാർഷ്ട്യം മാറ്റിവയ്ക്കണമെന്നും കേന്ദ്രകമ്മിറ്റി തീരുമാനിച്ചിട്ടുണ്ടെന്ന് എം.എ. ബേബി പറഞ്ഞു. സെപ്തംബറിൽ ചേരുന്ന വിശാല സംസ്ഥാന സമിതിയിൽ തിരുത്തൽ നടപടികളുടെ രൂപരേഖയും നേതൃമാറ്റത്തിന്റെ ആവശ്യകതയും ചർച്ച ചെയ്യുമെന്നും അദ്ദേഹം കൂട്ടിച്ചേർത്തു.
വിഴിഞ്ഞം ഓഹരി കൈമാറ്റ വിഷയത്തിൽ ഗുരുതര ദുരൂഹതകൾ നിലനിൽക്കുന്നുവെന്നും എം.എ. ബേബി ആരോപിച്ചു. സിപിഐഎം കണ്ണൂർ ജില്ലാ സെക്രട്ടറി കെ.കെ. രാഗേഷിനെതിരെ ഇതുവരെ പരാതികളൊന്നും ലഭിച്ചിട്ടില്ലെന്നും അദ്ദേഹം വ്യക്തമാക്കി.
