ഡല്ഹി: മുഖ്യ തെരഞ്ഞെടുപ്പ് കമ്മീഷണർ ജ്ഞാനേഷ് കുമാറിന്റെ രാജി ആവശ്യപ്പെട്ട് കോക്ക്രോച്ച് ജന്താ പാർട്ടി (സിജെപി) വീണ്ടും രംഗത്ത്.
സെപ്റ്റംബർ 26നകം ജ്ഞാനേഷ് കുമാർ രാജിവെച്ചില്ലെങ്കില് രാജ്യവ്യാപക പ്രതിഷേധം ആരംഭിക്കുമെന്ന് യുവജന കൂട്ടായ്മയായ സിജെപി വെള്ളിയാഴ്ച മുന്നറിയിപ്പ് നല്കി.
ഒക്ടോബർ 2 ഗാന്ധിജയന്തി ദിനത്തില് മുംബൈയില് നിന്നായിരിക്കും പ്രതിഷേധം ആരംഭിക്കുകയെന്നും തുടർന്ന് രാജ്യത്തെ വിവിധ നഗരങ്ങളിലേക്ക് സമരം വ്യാപിപ്പിക്കുമെന്നും സംഘടന അറിയിച്ചു. "ജ്ഞാനേഷ് കുമാർ നാളെക്കകം രാജിവെച്ചില്ലെങ്കില് ഒക്ടോബർ 2ന് മുംബൈയില് നിന്ന് സിജെപി രാജ്യവ്യാപക പ്രതിഷേധം ആരംഭിക്കും. തുടർന്ന് സമരം രാജ്യത്തെ വിവിധ നഗരങ്ങളിലേക്ക് വ്യാപിപ്പിക്കും," എന്നാണ് സംഘടന എക്സില് പങ്കുവെച്ച കുറിപ്പില് വ്യക്തമാക്കിയത്.
തെരഞ്ഞെടുപ്പ് കമ്മീഷനിലെ പരിഷ്കാരങ്ങളും വോട്ടർപട്ടികയിലെ സ്പെഷ്യല് ഇന്റൻസീവ് റിവിഷൻ (SIR) നടപടികളുമാണ് നിലവില് സിജെപി പ്രധാനമായും ഉയർത്തുന്ന വിഷയങ്ങള്. തെരഞ്ഞെടുപ്പ് കമ്മീഷന്റെ പ്രവർത്തനവുമായി ബന്ധപ്പെട്ട പരിഷ്കാരങ്ങളും വോട്ടർപട്ടിക പരിഷ്കരണ നടപടികളും സംബന്ധിച്ച് പ്രതിഷേധം ശക്തമാക്കാനാണ് സംഘടനയുടെ നീക്കം.
