ചേർത്തല: ക്ഷേത്രത്തിലെ കാണിക്കവഞ്ചി കുത്തിത്തുറന്ന് മോഷണം നടത്താൻ ശ്രമിച്ച അന്തർസംസ്ഥാന സ്വദേശിയായ യുവാവിനെ നാട്ടുകാരൻ സാഹസികമായി പിടികൂടി പൊലീസിലേല്‍പ്പിച്ചു.
നിരവധി പൊലീസ് സ്റ്റേഷനുകളില്‍ മോഷണക്കേസുകളില്‍ പ്രതിയായ ബധിരനും മൂകനുമായ യുവാവാണ് പിടിയിലായത്. ചേർത്തല നഗരസഭ 23-ാം വാർഡിലെ മാടയ്ക്കല്‍ ഘണ്ഠാകർണ്ണ ക്ഷേത്രത്തില്‍ ഇന്ന് പുലർച്ചെ രണ്ടരയോടെയായിരുന്നു സംഭവം.
ക്ഷേത്രത്തിന് സമീപം താമസിക്കുന്ന ജയദേവൻ (52) ആണ് കള്ളനെ സാഹസികമായി കീഴടക്കിയത്. പിടികൂടുന്നതിനിടെയുണ്ടായ ശക്തമായ മല്‍പ്പിടുത്തത്തില്‍ റോഡിലേക്ക് വീണ് ജയദേവന്റെ നെഞ്ചിനും ശരീരത്തിനും പരിക്കേറ്റിട്ടുണ്ട്. ക്ഷേത്രത്തിലെ കുത്തുവിളക്ക് ഊരിയെടുത്ത് കാണിക്കവഞ്ചി കുത്തിത്തുറക്കുന്ന ശബ്ദം കേട്ടാണ് ജയദേവൻ ഉണർന്നത്. വീടിനുള്ളില്‍നിന്ന് നോക്കിയപ്പോള്‍ കാണിക്കവഞ്ചി തുറക്കാൻ ശ്രമിക്കുന്നയാളെ കണ്ടതിനെത്തുടർന്ന് ഇയാള്‍ ഉടൻ തന്നെ പുറത്തേക്കിറങ്ങുകയായിരുന്നു. ജയദേവനെ കണ്ടതോടെ ഓടിരക്ഷപ്പെടാൻ ശ്രമിച്ച പ്രതിയെ ഇയാള്‍ പിന്നാലെയെത്തി തടഞ്ഞുനിർത്തുകയായിരുന്നു. തുടർന്നുണ്ടായ പിടിവലിക്കൊടുവിലാണ് പ്രതിയെ കീഴടക്കിയത്.
ബഹളം കേട്ട് ഓടിക്കൂടിയ പ്രദേശവാസികള്‍ പ്രതിയുടെ കൈകാലുകള്‍ കയറുകൊണ്ട് കെട്ടിയിടുകയും വിവരമറിയിച്ചതിനെത്തുടർന്ന് സ്ഥലത്തെത്തിയ ചേർത്തല പോലീസ് ഇയാളെ കസ്റ്റഡിയിലെടുക്കുകയുമായിരുന്നു. ക്ഷേത്രവളപ്പിലെ മറ്റൊരു കാണിക്കവഞ്ചിയില്‍നിന്ന് കവർന്ന പണം പ്രതിയുടെ പോക്കറ്റില്‍നിന്ന് കണ്ടെത്തിയിട്ടുണ്ട്. കൂടാതെ കുറച്ച്‌ പൈസാ കാണിക്കവഞ്ചിക്കു സമീപം ചിതറിക്കിടക്കുന്ന നിലയിലുമായിരുന്നു.
പ്രതിയില്‍നിന്ന് ബുധനാഴ്ച ഗുരുവായൂരിലേക്കുള്ള ട്രെയിൻ ടിക്കറ്റും പോലീസ് കണ്ടെടുത്തു. ആലപ്പുഴ കടപ്പുറത്ത് കുതിരസവാരി നടത്തുന്നയാളുടെ സഹായിയായി ഇയാള്‍ ജോലി ചെയ്തുവരികയായിരുന്നുവെന്ന് പ്രാഥമിക ചോദ്യം ചെയ്യലില്‍ വ്യക്തമായിട്ടുണ്ട്. എന്നാല്‍ ഇയ്യാളുടെ പേരോ സ്വദേശമോ ഒന്നും നിർണയിക്കുന്ന ഒരു രേഖ പോലും ഇയ്യാളുടെ പക്കല്‍ ഇല്ലെന്ന് പൊലീസ് പറഞ്ഞു.
അടുത്തിടെ ദേശീയപാതയോരത്തെ പട്ടണക്കാട് മഹാദേവ ക്ഷേത്രത്തിലും മുത്താരമ്മൻ കോവിലിലും കാണിക്കവഞ്ചികള്‍ മോഷണം പോയിരുന്നു. ഈ കേസുകളിലെ പ്രതികളെ പിടികൂടാൻ കഴിയാത്തത് നാട്ടുകാരില്‍ വലിയ ആശങ്ക സൃഷ്ടിച്ചിട്ടുള്ളതിനിടെയാണ് പുതിയ സംഭവം. മറ്റ് സംസ്ഥാനങ്ങളില്‍നിന്നെത്തി ഇത്തരം മോഷണങ്ങളില്‍ ഏർപ്പെടുന്ന സംഘങ്ങള്‍ക്കെതിരെ കർശന നടപടി സ്വീകരിക്കണമെന്ന് പ്രദേശവാസികള്‍ ആവശ്യപ്പെട്ടു. സംഭവത്തില്‍ ചേർത്തല പോലീസ് വിപുലമായ അന്വേഷണം ആരംഭിച്ചിട്ടുണ്ട്.
