എറണാകുളം : ചേരാനല്ലൂര്‍ വാഹനാപകടത്തില്‍ പൊലീസിനെതിരെ ആരോപണവുമായി ജയബാലകൃഷ്ണന്റെ കുടുംബം. ജഡ്ജിയുടെ മകനെ സംരക്ഷിക്കാന്‍ ശ്രമം നടന്നതെന്ന് ജയബാലകൃഷ്ണന്റെ മകള്‍ ഭദ്രകീര്‍ത്തി പറഞ്ഞു. പൊലീസിന് തെറ്റ് പറ്റിയെന്ന് മന്ത്രി പറഞ്ഞിട്ടും ഇതുവരെ നീതി ലഭ്യമായിട്ടില്ലെന്ന് പറഞ്ഞ ഭദ്രകീര്‍ത്തി മൂന്ന് ആവശ്യങ്ങളും മുന്നോട്ട് വച്ചു.
അപകടത്തിന് കാരണക്കാരായ പിതാവായ ജഡ്ജിനേയും അറസ്റ്റ് ചെയ്യണം, സഹോദരന്റെ ഫോണില്‍ നിന്ന് പ്രതികളുടെ ഫോട്ടോ ഡിലീറ്റ് ചെയ്തതില്‍ നടപടി വേണം, 17കാരന്റെ ജാമ്യം റദ്ദാക്കണം തുടങ്ങിയ ആവശ്യങ്ങളാണ് കുടുംബം മുന്നോട്ട് വെക്കുന്നത്.
തങ്ങള്‍ ഇത്രയും പ്രതിഷേധിക്കുമെന്നോ ശക്തമായി നില്‍ക്കുമെന്നോ ഇവര്‍ പ്രതീക്ഷിച്ചിട്ടില്ലെന്ന് ഭദ്രകീര്‍ത്തി ചൂണ്ടിക്കാട്ടി. അതുകൊണ്ടുതന്നെയാണ് എന്റെ അച്ഛന്റെ മൃതദേഹം വിട്ടുകിട്ടുന്നതിന് മുന്നേ കൊന്നവനെ ഇവിടെ നിന്ന് പറഞ്ഞുവിട്ടത്. അതറിഞ്ഞ് രാത്രി ഞങ്ങളിവിടെ വന്ന് പ്രതിഷേധിച്ചു. തുടര്‍ന്ന് വീണ്ടും അവര്‍ അറസ്റ്റ് ചെയ്തു, ജാമ്യം കിട്ടി, അവര്‍ വീട്ടിലേക്കും പോയെന്നും മകൾ പറഞ്ഞു.
പൊലീസിന് തെറ്റ് പറ്റിയിട്ടുണ്ടെന്ന് ആഭ്യന്തരമന്ത്രി തന്നെ പറഞ്ഞു. ഞങ്ങളുടെ ഫോണ്‍ കൈയില്‍ നിന്ന് വലിച്ചെടുത്ത് പ്രതിയുടെ അച്ഛന്റെ കൂട്ടുകാരന്റെ കൈയിലാണ് കൊടുത്തത്. അയാളാണ് ഫോണില്‍ നിന്ന് ഫോട്ടോ ഡിലീറ്റ് ചെയ്ത് കളയുന്നത്. എന്നിട്ട് ഇനി ഇങ്ങനെ ആവര്‍ത്തിച്ചാല്‍ എന്ന ഭീഷണിയാണ്. പൊലീസ് സ്റ്റേഷന് അകത്ത് നടന്ന സംഭവമാണ്. അതില്‍ പോലും അവര്‍ക്കൊന്നും ചെയ്യാന്‍ സാധിച്ചിട്ടില്ല എന്നും ജയബാലകൃഷ്ണന്റെ മകൾ ആരോപിച്ചു.
