ചങ്ങനാശേരി: മോര്ക്കുളങ്ങര റെയില്വേ ലെവല് ക്രോസിന്റെ അപ്രോച്ച് റോഡ് തകര്ന്ന് യാത്ര ദുഷ്കരമായി. ചങ്ങനാശേരി-വാഴൂര് റോഡില് പാറേല് പള്ളിക്കു സമീപത്തുനിന്നുമാരംഭിച്ച് ചങ്ങനാശേരി ബൈപാസില് മോര്ക്കുളങ്ങര ഭാഗത്ത് എത്തിച്ചേരുന്ന റോഡാണ് ഈ ലെവല് ക്രോസിലൂടെ കടന്നു പോകുന്നത്.
അപ്രോച്ച് റോഡ് തകര്ന്നതോടെ വാഹനങ്ങള് ഇവിടെ കുരുക്കില്പ്പെടുന്നതു പതിവായി. ഇരുചക്രവാഹനങ്ങള് നിയന്ത്രണംവിട്ടു മറിയുന്നതും പതിവാണ്.
കഴിഞ്ഞ 10 വര്ഷത്തിലധികമായി ഈ ഭാഗം തകര്ന്നു കിടക്കുകയാണ്. മോര്ക്കുളങ്ങര എ.കെ.എം. സ്കൂള് ഉള്പ്പെടെ സ്കൂളുകളിലേക്കുള്ള വാഹനങ്ങള് സഞ്ചരിക്കുന്ന റോഡാണിത്.
വാഴൂര് റോഡില്നിന്നുള്ള വാഹനങ്ങള് ചങ്ങനാശേരി ടൗണിലെത്താതെ മതുമൂലയിലോ പാലാത്രച്ചിറയിലോ എത്തി എം.സി റോഡില് പ്രവേശിക്കുന്ന പ്രധാന റോഡുകൂടിയാണിത്. റോഡ് റെയില്വേ നന്നാക്കുകയോ അനുവാദം നല്കുകയോ വേണം. മോര്ക്കുളങ്ങര റെയില്വേ ലെവല്ക്രോസിന്റെ വശങ്ങളിലെ അപ്രോച്ച് റോഡിന്റെ അറ്റകുറ്റപ്പണികള് നടത്താന് റെയില്വേ തയാറാകണം.
അല്ലാത്തപക്ഷം നഗരസഭയ്ക്ക് അറ്റകുറ്റപ്പണികള് നടത്താന് അനുമതി നല്കണം. ലെവല് ക്രോസിലെ അപ്രോച്ച് റോഡ് റെയില്വേ അധീനതയിലുള്ളതിനാല് റോഡിന്റെ അറ്റകുറ്റപ്പണികള് നഗരസഭയ്ക്കോ പൊതുമരാമത്തുവകുപ്പിനോ ചെയ്യാനാകില്ല. അനുവാദം ലഭിച്ചാല് അറ്റകുറ്റപ്പണികള് നടത്താന് നഗരസഭ തയാറാണെന്നാണു നഗരസഭാധികൃതര് പറയുന്നത്.
