കോട്ടയം: ചങ്ങനാശേരിയില്‍ മൂന്നംഗ കുടുംബത്തെ മരിച്ച നിലയില്‍ കണ്ടെത്തിയ സംഭവത്തില്‍ പൊലീസ് അന്വേഷണം തുടരുന്നു.
കരിങ്കട വീട്ടില്‍ സാജു ആന്റണി (64), ഭാര്യ അനു (59), മകന്‍ സബിന്‍ (34) എന്നിവരാണ് മരിച്ചത്.
ബെഡ്‌റൂമില്‍ തൂങ്ങിമരിച്ച നിലയിലായിരുന്നു ദമ്പതികളുടെ മൃതദേഹം. സ്റ്റോര്‍ റൂമിലാണ് സബിനെ മരിച്ച നിലയില്‍ കണ്ടെത്തിയത്.
മാതാപിതാക്കള്‍ മരിച്ചത് കണ്ട് സബിനും ജീവനൊടുക്കുകയായിരുന്നുവെന്ന് പൊലീസ് സംശയിക്കുന്നു. സാജുവിന്റെയും സബിന്റെയും സാമ്പത്തിക ഇടപാടുകള്‍ കേന്ദ്രീകരിച്ച്‌ പൊലീസ് അന്വേഷണം പുരോഗമിക്കുകയാണ്.
സബിന്‍ ചില ഓണ്‍ലൈന്‍ ഗെയ്മുകളിലൂടെയും, ട്രേഡിങിലൂടെയും സാമ്പത്തിക നഷ്ടം വരുത്തിയിട്ടുണ്ടെന്ന് ബന്ധുക്കളില്‍ ചിലര്‍ മൊഴി നല്‍കിയിട്ടുണ്ടെന്നാണ് റിപ്പോര്‍ട്ട്. ഇതുസംബന്ധിച്ച്‌ പൊലീസ് അന്വേഷിക്കുന്നുണ്ട്.
കുവൈത്തിലുള്ള സബിന്റെ ഭാര്യയില്‍ നിന്നും അന്വേഷണസംഘം വിവരങ്ങള്‍ തേടും.
ദമ്പതികള്‍ എഴുതിയ രണ്ട് ആത്മഹത്യാക്കുറിപ്പുകള്‍ പൊലീസ് കണ്ടെത്തി. മകനെക്കുറിച്ചുള്ള ആശങ്കകളായിരുന്നു കുറിപ്പുകളില്‍ മുഴുവന്‍. സാമ്പത്തിക ബാധ്യതയാണ് മരിക്കാന്‍ കാരണമെന്ന് ഇതില്‍ പറയുന്നുണ്ടെന്നാണ് റിപ്പോര്‍ട്ട്.
മകന്‍ ജീവനൊടുക്കാന്‍ സാധ്യതയുണ്ടെന്നും, അവനെ നന്നായി നോക്കണമെന്നും ബന്ധുക്കള്‍ക്ക് എഴുതിയ കുറിപ്പില്‍ ദമ്പതികള്‍ കുറിച്ചതായാണ് വിവരം. സാജുവും അനുവും നല്ല വസ്ത്രങ്ങള്‍ ധരിച്ച നിലയിലായിരുന്നു. വീട്ടില്‍ ധരിക്കുന്ന വസ്ത്രങ്ങളായിരുന്നു സബിന്റെ ശരീരത്തിലുണ്ടായിരുന്നത്. ബാങ്ക് രേഖകളും ഫോണുകളും പരിശോധിക്കാനാണ് പൊലീസിന്റെ നീക്കം.
