കോട്ടയം : സിബിഎസ്ഇ പത്താം ക്ലാസിലെ ഒന്നാം പരീക്ഷയില് കുറഞ്ഞുപോയ ഒരു മാർക്ക് രണ്ടാം പരീഷയില് തിരിച്ചുപിടിച്ചതോടെ ആൻ വർഷ സുനേഷിന് ഫുൾ മാർക്കിന്റെ തിളക്കം. കോട്ടയം കല്ലറ പുത്തൻപള്ളി ഡോ. സുനേഷ് തമ്പി അരീച്ചിറയുടെയും കുറുപ്പന്തറ കണ്ണച്ചാൻപറമ്പില് ബേബിൻ കോരയുടെയും മകളാണ് ആൻ വർഷ.
രാജഗിരി ക്രിസ്തുജയന്തി പബ്ലിക് സ്കൂളിലെ വിദ്യാർഥിനിയായിരുന്ന ആൻ വർഷയ്ക്ക് ആദ്യ പരീക്ഷയുടെ ഫലം വന്നപ്പോള് സോഷ്യസ് സയൻസ് തിയറി പരീക്ഷയില് എണ്പതില് 79 മാർക്കായിരുന്നു ലഭിച്ചത്. മറ്റെല്ലാ വിഷയങ്ങള്ക്കും മുഴുവൻ മാർക്ക് കിട്ടിയപ്പോള് ഈ ഒരു മാർക്കിന്റെ കുറവുമൂലം ആകെയുള്ള അറുന്നൂറില് 599 മാർക്കേ കിട്ടിയുള്ളൂ.
തുടർന്നാണ് സിബിഎസ്ഇ പുതുതായി ഏർപ്പെടുത്തിയ രണ്ടാം പരീക്ഷ എന്ന അവസരം ഉപയോഗിക്കാൻ ആൻ തീരുമാനിച്ചത്. ശനിയാഴ്ചയാണ് രണ്ടാം പരീക്ഷയുടെ ഫലം വന്നത്. ഇതോടെ സോഷ്യല് സയൻസിനും 80 മാർക്ക് കിട്ടുകയും അറുന്നൂറില് അറുന്നൂറും നേടി പത്താം ക്ലാസ് വിജയം സമ്പൂർണമാകുകയും ചെയ്തു. ഇപ്പോള് മാന്നാനം കെഇ ഇംഗ്ലീഷ് മീഡിയം സ്കൂളില് മാത്സും കംപ്യൂട്ടർ സയൻസും എടുത്ത് പ്ലസ് വണിന് പഠിക്കുകയാണ് ആൻ വർഷ.
