തിരുവനന്തപുരം : സംസ്ഥാനത്ത് തുടർച്ചയായുണ്ടാകുന്ന പവര്കട്ടിനെതിരെ എകെജി സെന്ററില് മെഴുകുതിരി കത്തിച്ച് പ്രതിഷേധം. സിപിഐഎം കേന്ദ്രകമ്മിറ്റി അംഗം ഇപി ജയരാജന്റെ നേതൃത്വത്തിലാണ് പ്രതിഷേധം. വൈദ്യുതി മന്ത്രി വിഡ്ഢിത്തം പറയുകയാണെന്നും വൈദ്യുതി ചാര്ജ് വര്ധിപ്പിക്കാനാണ് നീക്കമെന്നും ഇപി ജയരാജന് പറഞ്ഞു. കഴിഞ്ഞ 10 വര്ഷം എവിടെയെങ്കിലും ആക്ഷേപം ഉണ്ടായിരുന്നോ എന്ന് ചോദിച്ച ഇപി, ഭരിക്കാന് അറിയില്ലെങ്കില് പഠിച്ചിട്ട് ഭരിക്കണമെന്നും മുഖ്യമന്ത്രിക്ക് പരിചയക്കുറവ് ഉണ്ടെങ്കില് പരിശീലനം നേടണമെന്നും പറഞ്ഞു.
അരണ്ട സര്ക്കാര് കേരളത്തിന് ബാധ്യതയായിരിക്കുന്നുവെന്നും ഇപി ജയരാജന് കൂട്ടിച്ചേര്ത്തു. സംസ്ഥാനത്ത് നിലവിലുളള വൈദ്യുതി പ്രതിസന്ധിയ്ക്ക് കാരണം മുന് എല്ഡിഎഫ് സര്ക്കാരാണെന്ന് വൈദ്യുതി വകുപ്പ് മന്ത്രി സണ്ണി ജോസഫ് കഴിഞ്ഞ ദിവസം ആരോപിച്ചിരുന്നു. ദീര്ഘകാലാടിസ്ഥാനത്തില് വൈദ്യുതി കരാറുകള് ഉണ്ടാക്കുന്നതില് മുന് സര്ക്കാര് വീഴ്ച വരുത്തിയതാണ് സ്ഥിതി വഷളാക്കിയതെന്നും സണ്ണി ജോസഫ് പറഞ്ഞു.
ചരിത്രത്തിലെ ഏറ്റവും ഉയര്ന്ന ഡിമാന്റ് ആണ് ഈ സീസണില് വൈദ്യുതിക്ക് ഉണ്ടായിരിക്കുന്നതെന്നും മുപ്പത് ദിവസം കൊണ്ട് യുഡിഎഫ് സര്ക്കാര് ഉണ്ടാക്കിയ പ്രതിഭാസമല്ല പവര്കട്ട് എന്നും മുഖ്യമന്ത്രി വി ഡി സതീശനും പറഞ്ഞിരുന്നു.
