ടോക്യോ: പുറംലോകവുമായി ഒരുബന്ധവുമില്ലാതെ, വാര്‍ത്തകളോ സംഭവങ്ങളോ അറിയാതെ അടുത്ത 12 വര്‍ഷം പൂര്‍ണമായ ഏകാന്തതയില്‍ കഴിയാന്‍ ജാപ്പനീസ് ബുദ്ധസന്യാസിയായ സോഗാകു താഗുച്ചി തീരുമാനിച്ചു.
ബുദ്ധമതവിശ്വാസത്തിലെ ഏറ്റവും കഠിനമായ വ്രതാനുഷ്ഠാനങ്ങളിലൊന്ന് പൂര്‍ത്തിയാക്കാനാണ് ഈ യുവസന്യാസി സ്വയം ലോകത്തില്‍നിന്ന് ഒറ്റപ്പെടുന്നത്. പുരാതന നഗരമായ ക്യോട്ടോയ്ക്ക് വടക്കുകിഴക്കായുള്ള ഹിയെയ് പര്‍വ്വതത്തിലെ എന്‍ര്യാകുജി ക്ഷേത്രത്തിന്റെ മഖ്ബറയിലാണ് നാന്‍സാംബോ ക്ഷേത്രത്തിലെ പ്രധാന സന്യാസിയായ താഗുച്ചി കഴിയുക. 2038 സെപ്റ്റംബര്‍ 11 വരെ ഇദ്ദേഹത്തിന് പുറംലോകവുമായി യാതൊരു സമ്പര്‍ക്കവുമുണ്ടാവില്ല.
തെന്‍ദായി ബുദ്ധവിഭാഗത്തിന്റെ സ്ഥാപകനായ സൈചോയുടെ സമാധിസ്ഥലം പരിപാലിക്കുന്ന 'ജിഷിന്‍' എന്ന പദവിയിലേക്കുള്ള പരിവര്‍ത്തനമാണ് താഗുച്ചി നടത്തുന്നത്. പുലര്‍ച്ചെ ഉണര്‍ന്ന് സമാധിസ്ഥാനത്തേക്ക് അര്‍പ്പിക്കാനുള്ള ഭക്ഷണം സ്വയം പാകം ചെയ്യുന്നതില്‍ തുടങ്ങി കടുത്ത നിഷ്ഠകളോടെയുള്ള ദിനചര്യയാണ് ഇദ്ദേഹത്തെ കാത്തിരിക്കുന്നത്. നിത്യേന മണിക്കൂറുകളോളം സൂത്രങ്ങള്‍ ചൊല്ലി പ്രാര്‍ത്ഥിക്കുന്നതിനൊപ്പം 3,000 തവണ സാഷ്ടാംഗം പ്രണമിച്ച്‌ ബുദ്ധനെ വന്ദിക്കുകയും വേണം. രാത്രിയില്‍ കുറച്ചു മണിക്കൂറുകള്‍ മാത്രം ഉറങ്ങി അനുഷ്ഠാനം തുടരുന്നതോടെ ബുദ്ധന്റെ ദൈവിക ദര്‍ശനം ലഭിക്കുമെന്നാണ് വിശ്വാസികളുടെ പ്രതീക്ഷ.
അനുഷ്ഠാനങ്ങള്‍ക്ക് പുറമെ, സമാധിസ്ഥലവും പരിസരവും അങ്ങേയറ്റം വൃത്തിയായി സൂക്ഷിക്കേണ്ട ചുമതലയും താഗുച്ചിക്കുണ്ട്. തോട്ടത്തില്‍ ഒരു ഇല പോലും വീണുകിടക്കാന്‍ പാടില്ല. കഠിനമായ കായിക അധ്വാനവും ഇവിടെ സന്‍ ധ്യാനത്തിന്റെ ഭാഗമായാണ് കണക്കാക്കുന്നത്. മേഖലയിലെ കഠിനമായ തണുപ്പുകാലമാണ് ഈ അനുഷ്ഠാനത്തിന്റെ ശാരീരികമായ വെല്ലുവിളി വര്‍ദ്ധിപ്പിക്കുന്നത്. ഈ പ്രക്രിയയുടെ കാഠിന്യം കാരണം 12 വര്‍ഷം പൂര്‍ത്തിയാക്കുന്നതിന് മുമ്പ് പല സന്യാസിമാരും രോഗബാധിതരായി മരണപ്പെട്ടിട്ടുണ്ട്.
1699-ല്‍ രേഖകള്‍ സൂക്ഷിക്കാന്‍ തുടങ്ങിയതിനുശേഷം 'ജിഷിന്‍' പദവിയിലെത്തുന്ന 118-ാമത്തെ മാത്രം സന്യാസിയാണ് താഗുച്ചി. രണ്ടാം ലോകമഹായുദ്ധത്തിന് ശേഷം കഴിഞ്ഞ 80 വര്‍ഷത്തിനിടയില്‍ ഈ കഠിനപാത തിരഞ്ഞെടുക്കുന്ന എട്ടാമത്തെ വ്യക്തി മാത്രമാണ് ഇദ്ദേഹമെന്ന് ത പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു. സൈചോയുടെ ഉപദേശങ്ങള്‍ അനുസരിച്ച്‌ ജീവിക്കണമെന്ന ആഗ്രഹം മനസ്സില്‍ വളര്‍ന്നതുകൊണ്ടാണ് താന്‍ ഈ പാത തിരഞ്ഞെടുത്തതെന്ന് മൗസോളിയം സമുച്ചയത്തിലേക്ക് പ്രവേശിക്കുന്നതിന് തൊട്ടുമുമ്പ് താഗുച്ചി മാധ്യമങ്ങളോട് പറഞ്ഞു. ഈ യാത്രയുടെ തുടക്കത്തില്‍ നില്‍ക്കാന്‍ കഴിഞ്ഞതില്‍ തനിക്ക് അതിയായ സന്തോഷമുണ്ടെന്നും അദ്ദേഹം വ്യക്തമാക്കി.
ഹിയെയ് പര്‍വ്വതം 'കൈഹോഗ്യോ' എന്ന അതികഠിനമായ മറ്റൊരു പരിശീലനരീതിക്കും പ്രശസ്തമാണ്. ഏഴു വര്‍ഷത്തിനിടെ 1,000 ദിവസം പര്‍വ്വതത്തിന് ചുറ്റും നടക്കുന്നതാണ് ഈ അനുഷ്ഠാനം. തുടക്കത്തില്‍ ദിവസം 19 മൈല്‍ വീതം നടക്കുന്ന സന്യാസിമാര്‍ ഏഴാം വര്‍ഷത്തില്‍ ദിവസം 52 മൈല്‍ വരെ നടക്കേണ്ടി വരും. ഈ പരിശീലനത്തിന്റെ അഞ്ചാം വര്‍ഷം ഏറ്റവും കഠിനമാണ്. 200 ദിവസങ്ങളിലായി 19 മൈല്‍ വീതം നടക്കുന്നതിന് പുറമെ, ഭക്ഷണവും വെള്ളവും ഉറക്കവുമില്ലാതെ ഒമ്പത് ദിവസം തുടര്‍ച്ചയായി പ്രാര്‍ത്ഥനയില്‍ കഴിയുന്ന 'ദോയിരി' എന്ന രീതിയും ഇതിന്റെ ഭാഗമാണ്.
