കൊച്ചി: ഗൂഗിള്‍ പേയുടെ വ്യാജ സ്‌ക്രീൻ ഷോട്ട് കാണിച്ച്‌ പണം തട്ടിയ ആള്‍ അറസ്റ്റില്‍.
പെരുമ്പാവൂർ കാഞ്ഞിരക്കാട് പള്ളിപടി ഭാഗത്ത് കോന്നം കുടി വീട്ടില്‍ ആസിഫ് കെ ഹസൻ (28)നെയാണ് മൂവാറ്റുപുഴ എസ്‌എച്ച്‌ഒ സുബിൻ ബിജുവിൻ്റെ നേതൃത്വത്തിലുള്ള അന്വേഷണ സംഘം അറസ്റ്റ് ചെയ്തത്.
മൂവാറ്റുപുഴ എടിഎമ്മില്‍ പണം നിക്ഷേപിക്കാൻ ചെന്ന ആളില്‍ നിന്നും ഗൂഗിള്‍ പേയുടെ വ്യാജ സ്‌ക്രീൻ ഷോട്ട് കാണിച്ച്‌ 10,000 രൂപാ തട്ടിയെടുക്കുകയായിരുന്നു. 14ന് ആണ് കേസിനാസ്പദമായ സംഭവം.
പണം നിക്ഷേപിക്കാൻ വരുന്നവരോട് തനിക്ക് എ റ്റി എമ്മില്‍ നിന്നും പണം എടുക്കാൻ സാധിക്കുന്നില്ലാ എന്നും പണം നല്‍കിയാല്‍ ഗൂഗിള്‍ പേ വഴി പണം ട്രാൻസ്ഫർ ചെയ്തു നല്‍കാം എന്നും പറഞ്ഞ് വിശ്വസിപ്പിച്ച്‌ ഗൂഗിള്‍ പേ ചെയ്തെന്ന രീതിയില്‍ വ്യാജ സ്‌ക്രീൻ ഷോട്ട് കാണിച്ചാണ് പ്രതി തട്ടിപ്പ് നടത്തി വന്നിരുന്നത്.
സമാന തട്ടിപ്പിന് മുമ്പ് റിമാൻഡില്‍ കഴിഞ്ഞിട്ടുള്ള ഇയാള്‍ ഇത്തരത്തില്‍ വേറെയും തട്ടിപ്പുകള്‍ നടത്തിയിട്ടുണ്ടോ എന്ന കാര്യം അന്വേഷിച്ചു വരുന്നു.
എസ് ഐ മാരായ ആർ ബി റോഷ്‌നി , സി .ബി അനില്‍ കുമാർ സീനിയർ സിവില്‍ പൊലീസ് ഓഫീസർമാരായ സന്ദീപ് ബാബു, ഇർഫാൻ ഹബീബ് , എം പി രതിഷ് , ശ്രീജു രാജൻ, വിപിൻ വർക്കി, ഷിജു രാജപ്പൻ എന്നിവരും അന്വേഷണ സംഘത്തിലുണ്ടായിരുന്നു. കോടതിയില്‍ ഹാജരാക്കിയ പ്രതിയെ റിമാൻഡ് ചെയ്തു.
