ടോക്യോ: ഏഷ്യൻ ഗെയിംസ് വനിതാ ലോങ് ജംപില്‍ മലയാളി താരം ആൻസി സോജന് വെള്ളി മെഡല്‍. 6.53 മീറ്റർ ദൂരം ചാടിയാണ് ആൻസി ഈ തിളക്കമാർന്ന നേട്ടം സ്വന്തമാക്കിയത്.
വെറും രണ്ട് സെന്റീമീറ്റർ വ്യത്യാസത്തിലാണ് താരത്തിന് സ്വർണം നഷ്ടമായത്. അവസാന ശ്രമത്തില്‍ 6.55 മീറ്റർ ചാടിയ ചൈനീസ് താരം ഒന്നാം സ്ഥാനം പിടിച്ചെടുക്കുകയായിരുന്നു. മെഡല്‍ നേട്ടത്തില്‍ സന്തോഷമുണ്ടെന്നും എന്നാല്‍ 6.60 മീറ്റർ പ്രതീക്ഷിച്ചിരുന്നതിനാല്‍ സ്വർണം നഷ്ടമായതില്‍ ചെറിയ നിരാശയുണ്ടെന്നും ആൻസി സോജൻ പ്രതികരിച്ചു.
തൃശൂർ നാട്ടികയിലുള്ള ആൻസിയുടെ വീട്ടിലേക്ക് ചരിത്രവിജയം ആഘോഷിക്കാൻ നാടൊന്നാകെ ഒഴുകിയെത്തി. ഏഴ് മീറ്റർ ജംപ് ആയിരുന്നു ആൻസിയുടെ പ്രധാന സ്വപ്നമെന്നും അവിടുത്തെ പ്രതികൂല കാലാവസ്ഥ പ്രകടനത്തെ ചെറിയ രീതിയില്‍ ബാധിച്ചെന്നും കുടുംബാംഗങ്ങള്‍ വ്യക്തമാക്കി.
അതേസമയം, പുരുഷന്മാരുടെ ലോങ് ജംപില്‍ മലയാളി താരം എം. ശ്രീശങ്കർ ഫൈനലിലേക്ക് യോഗ്യത നേടിയിട്ടുണ്ട്. മറ്റു അത്‌ലറ്റിക്സ് ഇനങ്ങളിലും ഇന്ത്യ മികച്ച പ്രകടനം തുടരുകയാണ്. സ്ക്വാഷില്‍ ഇന്ത്യ രണ്ട് വെള്ളി മെഡലുകള്‍ സ്വന്തമാക്കി. പുരുഷ വിഭാഗത്തില്‍ അഭയ് സിംഗും വനിതാ വിഭാഗത്തില്‍ അനാഹത് സിങ്ങുമാണ് വെള്ളി നേടിയത്. വനിതകളുടെ 200 മീറ്ററില്‍ ഹരിത ഭദ്രയും ഡെക്കാത്ത്ലോണില്‍ തേജസ്വിൻ ശങ്കറും ഇന്ത്യയ്ക്കായി വെങ്കല മെഡലുകള്‍ അണിഞ്ഞു. വനിതകളുടെ മൂവായിരം മീറ്റർ സ്റ്റീപ്പിള്‍ചേസിലും ഇന്ത്യക്ക് വെങ്കലം ലഭിച്ചു. ഇന്ത്യയുടെ പാറുള്‍ ചൗധരിയാണ് വെങ്കലം നേടിയത്.
