തിരുവനന്തപുരം: ഓണക്കാലത്ത് സംസ്ഥാനത്ത് മദ്യവില്പനയില് വൻ വർധനവ്. ഉത്രാടം വരെയുള്ള എട്ട് ദിവസത്തിനിടെ 771.29 കോടി രൂപയുടെ മദ്യമാണ് ബെവ്കോയും കണ്സ്യൂമർഫെഡും വഴി വിറ്റഴിച്ചത്.
കഴിഞ്ഞ വർഷം ഇതേ എട്ട് ദിവസങ്ങളില് 694.96 കോടി രൂപയുടെ മദ്യവില്പന നടന്ന സ്ഥാനത്താണ് ഈ വർധന.
ഉത്രാട ദിനത്തില് മാത്രം സംസ്ഥാനത്ത് 126.31 കോടി രൂപയുടെ മദ്യവില്പന നടന്നുവെന്നാണ് സർക്കാരിൻ്റെ കണക്കുകള് വ്യക്തമാക്കുന്നത്. കണ്സ്യൂമർഫെഡിന്റെ ഉടമസ്ഥതയിലുള്ള ഔട്ട്ലെറ്റുകള് വഴി മാത്രം ഉത്രാടത്തിന് 20 കോടി രൂപയുടെ മദ്യമാണ് വിറ്റഴിച്ചത്.
ഓണത്തോടനുബന്ധിച്ച് ബെവ്കോയുടെയും കണ്സ്യൂമർഫെഡിന്റെയും പ്രമുഖ ഔട്ട്ലെറ്റുകളിലെല്ലാം വൻ തിരക്കാണ് അനുഭവപ്പെട്ടത്. മലയാളി ഓണാഘോഷത്തില് മദ്യത്തിന് കുറവൊന്നും വരുത്തിയില്ലെന്നാണ് ഈ കണക്കുകള് വ്യക്തമാക്കുന്നത്. എന്നാല് ഏത് ഔട്ട്ലെറ്റിലാണ് ഏറ്റവും കൂടുതല് മദ്യം വിറ്റഴിച്ചതെന്ന വിവരം സംസ്ഥാന സർക്കാർ പുറത്തുവിട്ടിട്ടില്ല
