ഈരാറ്റുപേട്ട: പൂഞ്ഞാര്‍ തെക്കേക്കരയിലെ ആദിവാസി യുവാവ്‌ അഭിലാഷിനെ പോലീസ് മര്‍ദ്ദിച്ചെന്ന പരാതിയില്‍ പ്രതിഷേധവുമായി സി.പി.എം രംഗത്ത്‌.
സംഭവത്തില്‍ നിഷ്‌പക്ഷവും നീതിപൂര്‍വവുമായ അന്വേഷണം ഉറപ്പാക്കണമെന്നും അന്വേഷണച്ചുമതലയുള്ള ഡി.വൈ.എസ്‌.പിയെ അന്വേഷണത്തില്‍നിന്ന്‌ മാറ്റിനിര്‍ത്തണമെന്നും ആവശ്യപ്പെട്ട്‌ സി.പി.എം പൂഞ്ഞാര്‍ ഏരിയ കമ്മിറ്റിയുടെ നേതൃത്വത്തില്‍ ഈരാറ്റുപേട്ട പോലീസ് സ്‌റ്റേഷനിലേക്ക്‌ മാര്‍ച്ചും പ്രതിഷേധയോഗവും സംഘടിപ്പിച്ചു.
ചേന്നാട്‌ കവലയില്‍നിന്ന്‌ ആരംഭിച്ച മാര്‍ച്ചില്‍ നിരവധി പ്രവര്‍ത്തകര്‍ പങ്കെടുത്തു. പോലീസ് സ്‌റ്റേഷനു മുന്നില്‍ നടന്ന പ്രതിഷേധയോഗം സി.പി.എം ജില്ലാ സെക്രട്ടേറിയറ്റ്‌ അംഗം കെ. രാജേഷ്‌ ഉദ്‌ഘാടനം ചെയ്‌തു. ആദിവാസി യുവാവിനെതിരായ മര്‍ദ്ദനപരാതിയില്‍ നീതി ഉറപ്പാക്കുന്നതില്‍ വീഴ്‌ചയുണ്ടാകരുതെന്നും ആരോപണങ്ങളുടെ നിജസ്‌ഥിതി പുറത്തുകൊണ്ടുവരാന്‍ സ്വതന്ത്രവും സുതാര്യവുമായ അന്വേഷണം വേണമെന്നും പ്രതിഷേധക്കാര്‍ ആവശ്യപ്പെട്ടു.
അന്വേഷണച്ചുമതലയുള്ള ഡി.വൈ.എസ്‌.പിയെ മാറ്റിനിര്‍ത്തി മറ്റൊരു ഉദ്യോഗസ്‌ഥന്റെ നേതൃത്വത്തില്‍ അന്വേഷണം നടത്തണം. പരാതിയുടെ ഗൗരവം കണക്കിലെടുത്ത്‌ അന്വേഷണത്തില്‍ ഒരു തരത്തിലുള്ള സ്വാധീനവും ഇടപെടലും ഉണ്ടാകാത്ത സാഹചര്യം ഉറപ്പാക്കണം.
ആരോപണങ്ങള്‍ വിശദമായി പരിശോധിച്ച്‌ കുറ്റക്കാരെന്ന്‌ കണ്ടെത്തുന്നവര്‍ക്കെതിരെ കര്‍ശന നിയമനടപടി സ്വീകരിക്കണം. പരാതിക്കാരന്റെ അവകാശങ്ങള്‍ സംരക്ഷിക്കുകയും അദ്ദേഹത്തിന്‌ നീതി ഉറപ്പാക്കുകയും ചെയ്യുന്നതിന്‌ സര്‍ക്കാര്‍ അടിയന്തരമായി ഇടപെടണമെന്നും മാര്‍ച്ച്‌ ആവശ്യപ്പെട്ടു.
ആദിവാസി വിഭാഗത്തില്‍പ്പെട്ട യുവാവിന്‌ നേരെ പോലീസ് അതിക്രമം നടന്നെന്ന പരാതി ഗൗരവത്തോടെ കാണേണ്ടതാണെന്നും സംഭവത്തില്‍ സത്യാവസ്‌ഥ പുറത്തുവരേണ്ടത്‌ അനിവാര്യമാണെന്നും യോഗത്തില്‍ നേതാക്കള്‍ ചൂണ്ടിക്കാട്ടി. നിയമം നടപ്പാക്കേണ്ട ഉദ്യോഗസ്‌ഥര്‍ക്കെതിരെ തന്നെ ആരോപണം ഉയര്‍ന്ന സാഹചര്യത്തില്‍ അന്വേഷണം സുതാര്യമായിരിക്കണമെന്നും പരാതിക്കാരന്‌ നീതി ലഭിക്കുന്നതുവരെ വിഷയത്തില്‍ ഇടപെടല്‍ തുടരുമെന്നും നേതാക്കള്‍ വ്യക്‌തമാക്കി.സി.പി.എം ജില്ലാ കമ്മിറ്റിയംഗം ജോയി ജോര്‍ജ്‌ അധ്യക്ഷത വഹിച്ചു.
എ.കെ.എസ്‌. സംസ്‌ഥാന സെക്രട്ടറി പി.കെ വിജയകുമാര്‍, പി.കെ.എസ്‌ ജില്ലാ പ്രസിഡന്റ്‌ എസ്‌. അനില്‍, ആദിവാസി ഉന്നതിയിലെ ഊരുമൂപ്പന്‍ ചന്ദ്രന്‍, സി.പി.എം ജില്ലാ കമ്മിറ്റിയംഗം രമാ മോഹന്‍, പൂഞ്ഞാര്‍ ഏരിയ സെക്രട്ടറി ടി.എസ്‌. സിജു, ലോക്കല്‍ സെക്രട്ടറി പി.എ. ഷെമീര്‍ എന്നിവര്‍ പ്രസംഗിച്ചു.
കുറ്റക്കാര്‍ക്കെതിരേ
നടപടി വേണം: പി.ഡി.പി.
ഈരാറ്റുപേട്ട: പൂഞ്ഞാര്‍ പെരിങ്ങുളത്ത്‌ ദളിത്‌ യുവാവിനെ മര്‍ദിച്ച സംഭവത്തില്‍ സമഗ്ര അന്വേഷണം നടത്തി കുറ്റക്കാര്‍ക്കെതിരെ കര്‍ശന നടപടി സ്വീകരിക്കണമെന്ന്‌ പി.ഡി.പി. കോട്ടയം ജില്ലാ പ്രസിഡന്റ്‌ നിഷാദ്‌ നടയ്‌ക്കല്‍ ആവശ്യപ്പെട്ടു.നിയമം നടപ്പാക്കേണ്ടവര്‍ തന്നെ ജനങ്ങളില്‍ ഭയവും അവമതിപ്പും സൃഷ്‌ടിക്കുന്ന തരത്തില്‍ പ്രവര്‍ത്തിക്കുന്നത്‌ പോലീസിനോടുള്ള പൊതുജനവിശ്വാസം തകര്‍ക്കുമെന്ന്‌ അദ്ദേഹം പറഞ്ഞു.
സംഭവത്തിന്റെ എല്ലാ വശങ്ങളും പരിശോധിച്ച്‌ ഉത്തരവാദികളായവരെ നിയമത്തിനു മുന്നില്‍ കൊണ്ടുവരണം.സംഭവത്തില്‍ കുറ്റക്കാര്‍ക്കെതിരെ നടപടി ആവശ്യപ്പെട്ട്‌ ആഭ്യന്തര മന്ത്രിക്കും ഉന്നത പോലീസ് മേധാവികള്‍ക്കും പരാതി നല്‍കാന്‍ പി.ഡി.പി. തീരുമാനിച്ചതായും നിഷാദ്‌ പറഞ്ഞു.
