കൊച്ചി: ടൂറിസ്റ്റ് ബസുകള്ക്ക് ഏകീകൃത വെള്ളനിറം നിര്ബന്ധമാക്കിയ മുന് ഉത്തരവ് സംസ്ഥാന സർക്കാർ പിന്വലിച്ചു. സ്റ്റേറ്റ് ട്രാന്സ്പോര്ട്ട് അതോറിറ്റി ഇക്കാര്യം അറിയിച്ചതിനെത്തുടര്ന്ന് ഹൈക്കോടതി ഇതിന് അംഗീകാരം നല്കി.
ഇതോടെ ബസ് ഉടമകള്ക്ക് വാഹനങ്ങള്ക്ക് ഇഷ്ടമുള്ള നിറം നല്കാന് സാധിക്കും. 2022ൽ വടക്കാഞ്ചേരി ബസ് അപകടത്തിന് പിന്നാലെയാണ് ടൂറിസ്റ്റ് ബസുകള്ക്ക് വെള്ളനിറം നിര്ബന്ധമാക്കിയത്.
കളറിൽ അടക്കം കടുത്ത നിയന്ത്രണങ്ങൾ ഏർപ്പെടുത്തിയതോടെ സംസ്ഥാനത്തെ ടൂറിസ്റ്റ് ബസ് മേഖല കടുത്ത പ്രതിസന്ധിയിലാണെന്ന് ഉടമകള് പരാതിപ്പെട്ടിരുന്നു. മറ്റ് സംസ്ഥാനങ്ങളില് നിന്നുള്ള ഓള് ഇന്ത്യ പെര്മിറ്റ് ബസുകള്ക്ക് ഇത്തരം നിയന്ത്രണമില്ലാത്തത് കേരളത്തിലെ വാഹനങ്ങള്ക്ക് ഓട്ടം ലഭിക്കാത്ത അവസ്ഥയുണ്ടാക്കി. ആയിരക്കണക്കിന് തൊഴിലാളികളെയും ഇത് ബാധിച്ചു. ഈ സാഹചര്യത്തില് ഉടമകളുടെ നിവേദനങ്ങള് പരിഗണിച്ചാണ് നിറംമാറ്റം പുനഃപരിശോധിക്കാന് കഴിഞ്ഞ സെപ്റ്റംബറില് സര്ക്കാര് വിജ്ഞാപനമിറക്കിയത്.
പുതിയ ഉത്തരവ് പ്രകാരം ടൂറിസ്റ്റ് ബസുകൾക്ക് ഇഷ്ടമുള്ള നിറം തിരഞ്ഞെടുക്കാമെങ്കിലും, മറ്റ് വാഹനങ്ങളിലെ ഡ്രൈവർമാരുടെ ശ്രദ്ധ തിരിക്കുന്ന രീതിയിലുള്ള വലിയ ചിത്രങ്ങൾ, ഗ്രാഫിക്സുകൾ, എഴുത്തുകൾ, പരസ്യങ്ങൾ എന്നിവ ബോഡിയിൽ പ്രദർശിപ്പിക്കാൻ അനുമതിയില്ല. നിയമവിരുദ്ധമായി എൽഇഡി, സ്ട്രിപ്പ് ലൈറ്റുകൾ, ഹാലൊജൻ ലാമ്പുകൾ തുടങ്ങിയവ സ്ഥാപിക്കുന്ന ബസുകൾക്ക് ഫിറ്റ്നസ് സർട്ടിഫിക്കറ്റ് അനുവദിക്കില്ലെന്നും കോടതി വ്യക്തമാക്കി. 2019ലെ ഹൈക്കോടതി ഉത്തരവിലും കേന്ദ്ര മോട്ടോർ വാഹന നിയമത്തിലും നിഷ്കർഷിച്ചിട്ടുള്ള സുരക്ഷാ ചട്ടങ്ങൾ കർശനമായി പാലിക്കണമെന്നും നിർദേശിച്ചിട്ടുണ്ട്.






