തിരുവനന്തപുരം: ബിജെപി വിട്ട പത്മജ വേണുഗോപാലിനെ കോണ്ഗ്രസിലേക്ക് തിരിച്ചെടുക്കുന്നതിനെതിരെ പാർട്ടിക്കുള്ളില് എതിർപ്പ് ശക്തമാകുന്നു.
യുവനേതാക്കളടക്കം പരസ്യമായി എതിർപ്പുമായി രംഗത്തെത്തിയതോടെ, കോണ്ഗ്രസ് പ്രവേശനത്തിനായി നേതൃത്വത്തിന് ഉടൻ കത്ത് നല്കേണ്ടെന്ന തീരുമാനത്തിലാണ് പത്മജ.
ബിജെപിയിലായിരുന്നപ്പോള് കോണ്ഗ്രസിനെതിരെ നടത്തിയ പ്രസ്താവനകളെല്ലാം പത്മജ ആദ്യം തിരുത്തിപ്പറയണമെന്നാണ് പാർട്ടിക്കുള്ളില് ഉയരുന്ന പ്രധാന ആവശ്യം. എതിർപ്പുകള് രൂക്ഷമായതോടെ തിടുക്കപ്പെട്ട് നേതൃത്വത്തെ സമീപിക്കേണ്ടെന്നും, തല്ക്കാലം കാത്തിരിക്കാമെന്നുമാണ് പത്മജയുടെ തീരുമാനം. അതേസമയം, പത്മജയുടെ ഭാഗത്തുനിന്ന് ഔദ്യോഗികമായി കത്ത് ലഭിക്കുന്ന മുറയ്ക്ക് വിഷയം ചർച്ച ചെയ്യാനാണ് കോണ്ഗ്രസ് നേതൃത്വത്തിന്റെ തീരുമാനം. പാർട്ടിയില് തിരിച്ചെടുത്താലും പദവികള് നല്കുന്നത് വിശദമായ ആലോചനകള്ക്ക് ശേഷം മാത്രമായിരിക്കുമെന്നാണ് വിവരം.
പത്മജയുടെ മടങ്ങിവരവിനെതിരെ രൂക്ഷവിമർശനവുമായി കോഴിക്കോട് ഡിസിസി ജനറല് സെക്രട്ടറി നിജേഷ് അരവിന്ദ് ഫേസ്ബുക്കിലൂടെ രംഗത്തെത്തിയിരുന്നു. അധികാരത്തിന്റെ തേൻ നുകരാൻ ചെങ്കൊടിയും താമരയും തേടിപ്പോയവർ വർഗവഞ്ചകരാണെന്ന് അദ്ദേഹം കുറിച്ചു. വർഗീയത പറഞ്ഞും നേതാക്കളെ ആക്ഷേപിച്ചും കോണ്ഗ്രസിനെ ആക്രമിച്ചവരെ സ്വീകരിക്കാൻ ബൊക്കയുമായി കാത്തിരിക്കുന്നവർ, ഒരു മോഹങ്ങളുമില്ലാതെ പാർട്ടിക്ക് വേണ്ടി ജീവൻ കൊടുത്ത സാധാരണ പ്രവർത്തകരെക്കൂടി ഓർക്കണമെന്നും നിജേഷ് അരവിന്ദ് വിമർശിച്ചു.
പത്മജ കോണ്ഗ്രസിലേക്ക് തിരിച്ചുവരുന്നതില് എതിർപ്പ് പരസ്യമാക്കി യൂത്ത് കോണ്ഗ്രസ് നേതാവ് ജിന്റോ ജോണും രംഗത്തെത്തി. കോണ്ഗ്രസില് 'നെപ്പോ കിഡ്ഡു'കളുടെ കാലം കഴിഞ്ഞെന്നും ഇതുവരെ കോണ്ഗ്രസിലേക്ക് വരുമെന്ന് പറയാത്തവർക്ക് വേണ്ടിയടക്കം പരവതാനി വിരിക്കുകയാണെന്നും അദ്ദേഹം വിമർശിച്ചു.
ബിജെപിയടക്കമുള്ള പാർട്ടികളില് നിന്ന് കോണ്ഗ്രസിലേക്ക് തിരികെ വരാൻ തിരക്കുകൂട്ടുന്നവർ പൊടിക്ക് അടങ്ങണമെന്ന് ആവശ്യപ്പെട്ട അദ്ദേഹം സാധാരണ പ്രവർത്തകരെ കേള്ക്കാൻ നേതൃത്വം തയ്യാറാകണമെന്നും പറഞ്ഞു. നേതാക്കളെ ആക്ഷേപിച്ച് ഇറങ്ങിപ്പോയവർ തിരികെ വരുമ്പോള് പൊളിറ്റിക്കല് ക്ലാരിറ്റി വരുത്തണം. ആക്ഷേപിച്ച് ഇറങ്ങിപ്പോയവർക്ക് തോന്നുമ്പോള് തിരികെ കയറി വരാൻ കോണ്ഗ്രസ് പാർട്ടി വഴിയമ്പലമല്ലെന്നും ജിന്റോ ജോണ് പറഞ്ഞു.





