അയ്മനം: ഏറ്റുമാനൂർ ബ്ലോക്ക് പഞ്ചായത്തിന്റെ 2026-27 വാർഷിക പദ്ധതിയിൽ ഉൾപ്പെടുത്തിയ പെൺകുട്ടികൾക്കുള്ള സ്വയം പ്രതിരോധ പരിശീലനത്തിന്റെയും, ശിശുദിനത്തോടനുബന്ധിച്ച് ഏറ്റുമാനൂർ അഡീഷണൽ ഐസിഡിഎസ് പ്രോജക്റ്റിന് കീഴിലുള്ള 117 അങ്കണവാടികൾക്കുള്ള കളിപ്പാട്ട-പഠനോപകരണ വിതരണത്തിന്റെയും ഉദ്ഘാടനം ഏറ്റുമാനൂർ എംഎൽഎ നാട്ടകം സുരേഷ് നിർവഹിച്ചു. അയ്മനം ഗ്രാമപഞ്ചായത്ത് ഹാളിൽ നടന്ന ചടങ്ങിൽ ഏറ്റുമാനൂർ ബ്ലോക്ക് പഞ്ചായത്ത് പ്രസിഡന്റ് ജയ്മോൻ കരീമഠം അധ്യക്ഷത വഹിച്ചു.
അയ്മനം ഗ്രാമപഞ്ചായത്ത് പ്രസിഡന്റ് ബിന്ദു ഹരികുമാർ സ്വാഗതം ആശംസിച്ചു. കോട്ടയം ജില്ലാ പഞ്ചായത്ത് ആരോഗ്യ-വിദ്യാഭ്യാസ സ്റ്റാൻഡിങ് കമ്മിറ്റി ചെയർപേഴ്സൺ പി.കെ. വൈശാഖ് മുഖ്യപ്രഭാഷണം നടത്തി.
അങ്കണവാടികളിലേക്ക് കളിപ്പാട്ടങ്ങളും പഠനോപകരണങ്ങളും വാങ്ങുന്നതിനായി സംഭാവന നൽകിയ കേരള സബർമതി ചാരിറ്റബിൾ സൊസൈറ്റി, കുമരകത്തെ ബാക്ക് വാട്ടർ റിപ്പിൾസ് റിസോർട്ട്, ഗോകുലം റിസോർട്ട്, അബാദ് റിസോർട്ട് എന്നീ സ്ഥാപനങ്ങളെ ചടങ്ങിൽ എംഎൽഎ ആദരിച്ചു.
കുമരകം ഗ്രാമപഞ്ചായത്ത് പ്രസിഡന്റ് എ.പി. ഗോപി, ജില്ലാ പഞ്ചായത്ത് അംഗം ജിം അലക്സ്, ബ്ലോക്ക് പഞ്ചായത്ത് വൈസ് പ്രസിഡന്റ് മറിയാമ്മ ഫിലിപ്പ്, ബ്ലോക്ക് ആരോഗ്യ-വിദ്യാഭ്യാസ സ്റ്റാൻഡിങ് കമ്മിറ്റി ചെയർമാൻ അലൻ കുര്യാക്കോസ് മാത്യു, ക്ഷേമകാര്യ സ്റ്റാൻഡിങ് കമ്മിറ്റി ചെയർപേഴ്സൺ സുനിത ബിനു, ബ്ലോക്ക് പഞ്ചായത്ത് അംഗങ്ങളായ സബിത പ്രേംജി, നാസർ ചാത്തൻകോട്ടുമാലി, സിനു ജോൺ, പി.സി. ശ്രീദേവി, ആഷ രജി, സൂര്യ ആകാശ്, ഗ്രാമപഞ്ചായത്ത് അംഗങ്ങളായ നിഷ സുരേഷ്, സലിമ എന്നിവർ ആശംസകൾ നേർന്നു. ഏറ്റുമാനൂർ അഡീഷണൽ ശിശുവികസന പദ്ധതി ഓഫീസർ ആശാ റാണി ചടങ്ങിന് നന്ദി രേഖപ്പെടുത്തി.
