പാമ്പാടി: പാമ്പാടി ഗ്രാമപഞ്ചായത്ത് ബസ് സ്റ്റാൻഡ്, കമ്മ്യൂണിറ്റി ഹാൾ, സ്റ്റേഡിയം എന്നിവയുടെ നവീകരണത്തിനും മാർക്കറ്റ് ഷോപ്പിങ് കോംപ്ലക്സ് നിർമാണത്തിനുമുള്ള പദ്ധതിയും രൂപരേഖയും വിദഗ്ധസമിതി പഞ്ചായത്തിന് സമർപ്പിച്ചു.
ബസ് സ്റ്റാൻഡ് തറയുടെ നവീകരണം ഇന്റർലോക്ക് കട്ടകൾ ഉപയോഗിച്ച് നടത്തുന്നതിനും, കാലോചിതമായ വെയിറ്റിങ് ഷെഡ് നിർമിക്കുന്നതിനും, കംഫർട്ട് സ്റ്റേഷൻ ആധുനിക നിലവാരത്തിൽ നവീകരിക്കുന്നതിനും, ഓപ്പൺ സ്റ്റേജ് നിർമിക്കുന്നതിനുമാണ് പദ്ധതി വിഭാവനം ചെയ്യുന്നത്. ഡ്രെയിനേജ് സംവിധാനം കുറ്റമറ്റതാക്കാനും പദ്ധതിയിൽ നിർദേശമുണ്ട്.
മൂന്ന് ദശാബ്ദം പഴക്കമുള്ള കമ്മ്യൂണിറ്റി ഹാളിന്റെ മേൽക്കൂര മാറ്റി, സ്റ്റേജ് നവീകരിച്ച് ശബ്ദനിയന്ത്രണ സംവിധാനവും ശീതീകരണ സംവിധാനവും ഒരുക്കി ആകർഷകമാക്കാനും പദ്ധതി നിർദേശിക്കുന്നു.
സ്റ്റേഡിയത്തിൽ ഗ്രൗണ്ട് ഉയർത്തി ജലനിർഗമന സംവിധാനവും പ്രഭാതസവാരിക്കുള്ള സൗകര്യവും ഒരുക്കും.
ചന്തയിൽ പങ്ങട റോഡിന് താഴ് വശത്തായി ജില്ലാ പഞ്ചായത്ത് വിഹിതം കൂടി ചേർത്തുള്ള നിർമാണ പദ്ധതിയാണ് വിഭാവനം ചെയ്യുന്നത്. പങ്ങട റോഡിന് അഭിമുഖമായി രണ്ടാം നിലയുടെ നിർമാണം അടുത്ത ഘട്ടമായി നടത്തും. കെ.കെ. റോഡിന് അഭിമുഖമായുള്ള പഴയ ഷോപ്പിങ് കോംപ്ലക്സിലേക്ക് പ്രവേശന സൗകര്യം ലഭിക്കുന്ന വിധത്തിലാണ് പദ്ധതി തയ്യാറാക്കിയിരിക്കുന്നത്.
കാർഷിക വികസന കേന്ദ്രത്തിൽ കൃഷി വകുപ്പിന് കർഷകരുടെ യോഗം ചേരുവാൻ ഹാളും സൗകര്യമുള്ള ഓഫീസും, വിത്തുകളും തൈകളും ഇറക്കി വെക്കുവാനുള്ള സൗകര്യവും നൽകും.
വിദഗ്ധസമിതി അംഗമായ ആർക്കിടെക്റ്റ് ഷെറി കെ. ഐസക്ക് പഞ്ചായത്ത് ഭരണസമിതിക്ക് മുന്നിൽ പദ്ധതി വിശദീകരിച്ചു.
ജിസാറ്റ് മുൻ പ്രിൻസിപ്പാൾ പ്രൊഫ. സാജു ഏലിയാസ്, ഒ.എൻ.ജി.സി മുൻ ചീഫ് എൻജിനീയർ ജോർജ് ഏബ്രഹാം, കോക്കോബീൻ ഫാക്ടറി മുൻ ഡയറക്ടർ കുര്യൻ ചാണ്ടി, ആർ.ഐ.ടി ആർക്കിടെക്ചർ വിഭാഗം മേധാവി സുജിത്ത് കെ.എം, സിവിൽ വിഭാഗം മേധാവി ഡോ. അജിത് ടി, പ്രൊഫ. ധന്യ വി.എസ്, ആർക്കിടെക്റ്റ് അമൽ പച്ചിലക്കാടൻ, മുൻ ഇറിഗേഷൻ ഓവർസിയർ മാത്യു വർഗീസ് എന്നിവർ ഉൾപ്പെട്ട വിദഗ്ധസമിതിയാണ് പഞ്ചായത്തിന് പദ്ധതി കൈമാറിയത്.
ഗ്രാമപഞ്ചായത്ത് പ്രസിഡന്റ് അഡ്വ. സിജു കെ. ഐസക്ക്, വികസന കാര്യ സ്റ്റാൻഡിങ് കമ്മിറ്റി ചെയർമാൻ കെ.ആർ. ഗോപകുമാർ, എൻജിനീയറിങ് വിഭാഗം മേധാവി ബിനോയി എ.വി എന്നിവർ ചേർന്ന് വികസന രേഖ ഏറ്റുവാങ്ങി.
