കൊച്ചി:പത്മജ വേണുഗോപാല് കോണ്ഗ്രസിലേക്ക് മടങ്ങിവരുന്നുണ്ടെങ്കില് പാർട്ടിയോടും അണികളോടും പരസ്യമായി മാപ്പ് പറയണമെന്ന് കെ.എസ്.യു സംസ്ഥാന പ്രസിഡന്റ് അലോഷ്യസ് സേവ്യർ.
പാർട്ടി വിട്ടുപോയ സമയത്ത് ഉന്നയിച്ച ആരോപണങ്ങള് തിരുത്തണമെന്നും, തിരിച്ചെത്തിയാല് അവർക്ക് പ്രത്യേക പരിഗണന നല്കാതെ ബൂത്തുതലത്തില് പ്രവർത്തിക്കാൻ നിയോഗിക്കണമെന്നും അദ്ദേഹം ഫേസ്ബുക്ക് കുറിപ്പിലൂടെ ആവശ്യപ്പെട്ടു.
രാഹുല് ഗാന്ധിയുടെ നേതൃത്വത്തില് കോണ്ഗ്രസ് ശക്തമായി തിരിച്ചുവരുന്ന സാഹചര്യത്തില് ആർക്കും പാർട്ടിയിലേക്ക് വരാം, എന്നാല് അവർക്കായി ‘പച്ച പരവതാനി’ വിരിക്കുന്നതും ‘സെലിബ്രേറ്റഡ് പ്രിവിലേജുകള്’ നല്കുന്നതുമാണ് പ്രശ്നമെന്ന് അലോഷ്യസ് സേവ്യർ ചൂണ്ടിക്കാട്ടി. കഴിഞ്ഞ പത്ത് വർഷത്തിലേറെയായി പാർട്ടിക്കുവേണ്ടി കഷ്ടപ്പെട്ട സാധാരണക്കാരായ പ്രവർത്തകർക്കാണ് എല്ലാ മേഖലകളിലും മുൻഗണന ലഭിക്കേണ്ടത്.
കോണ്ഗ്രസ് ഏറ്റവും പ്രതിസന്ധി നേരിട്ട ഘട്ടത്തിലാണ് പാർട്ടിയുടെ മതേതര സ്വഭാവത്തെ തള്ളിപ്പറഞ്ഞ് പത്മജ ബിജെപിയിലേക്ക് പോയതെന്ന് കുറിപ്പില് പറയുന്നു. കെ. കരുണാകരൻ ഇന്ന് ജീവിച്ചിരുന്നെങ്കില് ബിജെപിയില് പോകുമായിരുന്നു എന്നതും, കോണ്ഗ്രസിലായിരുന്നപ്പോള് ചന്ദനക്കുറി തൊടാൻ പോലും ഭയമായിരുന്നുവെന്നും ബിജെപിയില് എത്തിയപ്പോഴാണ് ആ പേടി മാറിയതെന്നുമുള്ള രണ്ട് നുണകള് അവർ തിരിച്ചുവരുന്നതിന് മുൻപ് തിരുത്തേണ്ടതുണ്ടെന്ന് അലോഷ്യസ് വ്യക്തമാക്കി.
പൊതുസമൂഹത്തോട് മാപ്പ് പറഞ്ഞ് തിരികെ വന്നാലും അധികാരത്തിന്റെ തണലല്ല, മറിച്ച് ബൂത്ത് തലം മുതലുള്ള പടിപടിയായുള്ള പ്രവർത്തനമാണ് അവർക്ക് നല്കേണ്ടത്. പത്മജയ്ക്ക് പിന്നാലെ പദ്മിനി തോമസും കോണ്ഗ്രസിലേക്ക് മടങ്ങുന്നു എന്ന വാർത്തകളോടും അലോഷ്യസ് പ്രതികരിച്ചു. അവസരവാദത്തിനും അധികാരക്കൊതിക്കും വേണ്ടി പാളയം മാറുന്നവർക്കുവേണ്ടിയല്ല ലക്ഷക്കണക്കിന് പ്രവർത്തകർ തെരുവില് പോരാടിയതെന്നും, ‘പത്മജ-പദ്മിനിമാർ ബൂത്തുകളില് പ്രവർത്തിക്കട്ടെ’ എന്നും അദ്ദേഹം കുറിപ്പില് കുറിച്ചു.





