തിരുവനന്തപുരം : പുതിയ ഫാന്റസി ചിത്രവുമായി സംവിധായകൻ വിനയൻ വീണ്ടും പ്രേക്ഷകർക്ക് മുന്നിലേക്ക് എത്തുകയാണ്. ഗിന്നസ് പക്രുവും സാഗർ സൂര്യയുമാണ് ചിത്രത്തിൽ നായക കഥാപാത്രങ്ങളെ അവതരിപ്പിക്കുന്നത്. വിനയൻ സോഷ്യൽ മീഡിയയിലൂടെയാണ് ഇക്കാര്യം വ്യക്തമാക്കിയത്.
ഗിന്നസ് പക്രു, സാഗർ സൂര്യ എന്നിവർക്കൊപ്പം മലയാളത്തിലെ ശ്രദ്ധേയരായ ഇരുപതോളം യുവ നടീനടൻമാരും ഇരുനൂറിലധികം പൊക്കം കുറഞ്ഞ കലാകാരൻമാരും ഈ സിനിമയിൽ ഉണ്ടാകും. നിലവിൽ ചിത്രത്തിന്റെ പ്രീ പ്രൊഡക്ഷൻ ജോലികളും ടെസ്റ്റ് ഷൂട്ടും നടക്കുകയാണ്.
പുതിയ ടെക്നോളജിയുടെ സഹായത്തോടെ വ്യത്യസ്തമായ വിഷ്വൽ ട്രീറ്റിലൂടെയായിരിക്കും ഈ കഥയും കഥാപാത്രങ്ങളും പ്രേക്ഷകർക്ക് മുന്നിൽ അവതരിപ്പിക്കുകയെന്നും, അത് പ്രേക്ഷകരെ എൻറർടൈൻ ചെയ്യിക്കുമെന്നും അദ്ദേഹം പറഞ്ഞു. കൂടാതെ ഈ തലമുറയിലെ പ്രഗത്ഭരായ ടെക്നീഷ്യൻമാർ ഈ സിനിമയുടെ പിന്നണിയിൽ പ്രവർത്തിക്കുന്നുണ്ടെന്നും വിനയൻ തന്റെ സോഷ്യൽ മീഡിയ പോസ്റ്റിലൂടെ വ്യക്തമാക്കി.
