കോട്ടയം: മദ്യത്തിനും മയക്കുമരുന്നിനുമെതിരെ പാക്കിൽ പൗരസമിതിയുടെ നേതൃത്വത്തിൽ ‘തൂഫാൻ’ കൂട്ടയോട്ടവും റാലിയും സംഘടിപ്പിച്ചു. പള്ളം സെന്റ് പോൾസ് സ്കൂൾ മൈതാനം, ബുക്കാന സ്കൂൾ മൈതാനം എന്നിവിടങ്ങളിൽ നിന്ന് വിവിധ സ്കൂളുകളിലെ കുട്ടികളുടെ നേതൃത്വത്തിലാണ് റാലി ആരംഭിച്ചത്.
കലാരൂപങ്ങൾ, ഫ്ലാഷ് മോബ്, ബാൻഡ് സെറ്റുകൾ എന്നിവയുടെ അകമ്പടിയോടെ നടന്ന റാലി രാവിലെ 11 മണിയോടെ പാക്കിൽ സെന്റ് തോമസ് പാരിഷ് ഹാളിൽ എത്തി. തുടർന്ന് നടന്ന പൊതുസമ്മേളനം ഫ്രാൻസിസ് ജോർജ് എം.പി ഉദ്ഘാടനം ചെയ്തു. നാട്ടകം സുരേഷ് എം.എൽ.എ ചടങ്ങിൽ സന്നിഹിതനായിരുന്നു.
പൗരസമിതി പ്രസിഡന്റ് വി. കൃഷ്ണമൂർത്തി, റേ മാത്യു, ബേബി അലക്സ്, സി.വി. ബോസ്, ഡെന്നിസ് തോമസ്, മനോജ് വി. മാത്യു, ലിസിമോൾ സാബു, സിന്ധു സന്തോഷ്, ടി.പി. പൈലി, ജിജോ ജോസഫ്, ഹാലി ജോസഫ്, റോണി ജോസഫ് എന്നിവർ പരിപാടിയിൽ പങ്കെടുത്തു.
ലഹരിക്കെതിരായ സന്ദേശമുയർത്തി അസിസ്റ്റന്റ് എക്സൈസ് ഇൻസ്പെക്ടർ ജയരാജ് വി. അവതരിപ്പിച്ച ഓട്ടൻതുള്ളലും പരിപാടിയുടെ ഭാഗമായി അരങ്ങേറി. ആയിരത്തോളം കുട്ടികളും രക്ഷിതാക്കളും പൊതുജനങ്ങളും കൂട്ടയോട്ടത്തിലും തുടർന്നുള്ള പരിപാടികളിലും പങ്കെടുത്തു.
